Ishki ister ministri Erlan Turǵymbaev vedomstvoda ońtailandyrý jumystary qalai júrgiziletini týraly aitty, dep habarlaidy QazAqparat tilshisi.
«Elbasynyń tapsyrmasy negizinde ishki ister organdaryn 2019-2021 jyldary jańǵyrtý boiynsha Jol kartasy ázirlenip, iske asyrylyp jatyr. Alǵashqy kezeńde birshama qurylym taratyldy. Onyń ishinde IIM-niń 105 bólimshesi qysqartylyp, vedomstvoǵa qarasty on myńdaǵan organdar men bólimsheler taratyldy», - dedi ministr halyqqa esep berý kezdesýinde.
Erlan Turǵymbaevtyń aitýyna qaraǵanda, artyq dep tanylǵan basqarýshylyq bólimder qysqartylyp, 1180 basshylyq laýazym joiylǵan.
«Básekeli ortaǵa 32 nysan berildi. Ol nysandardyń barlyǵy kúzet qyzmetindegi mamandandyrylǵan kúzet kompaniialarǵa berilgenin atap ótý kerek. Osy ózgeristerdiń artynsha 100 myń halyqqa eseptegende politsiia qyzmetkerleriniń sany 471-den 393-ke azaidy. Osy ońtailandyrýdan túsken qarajat patrýldik politsiia qyzmetkerleriniń ailyǵyn 65 paiyzǵa, jedel qyzmetkerler men tergeýshilerdiń ailyǵyn 55 paiyzǵa, ýchaskelik politseiler men JOO muǵalimderiniń ailyǵyn 25 paiyzǵa, ózge de qyzmetkerlerdiń ailyǵyn 20 paiyzǵa arttyrýǵa jumsalady», - dedi ol.
Sonymen qatar, baspana úshin ótemaqy alatyn qyzmetkerlerdiń tizimi uzartylǵan.
«Jedel jáne tergeý bólimsheleriniń nariadtarymen birge mundai quqyqqa ýchaske politseileri, jasóspirimder isi jónindegi ispektorlar men patrýldik politsiia qyzmetkerleri ie boldy», - dedi Erlan Turǵymbaev.
