Foto: Polisia.kz
IIM esirtki qylmysyna qarsy is-qimyl departamenti Pavlodar oblysynyń politsiia departamentimen birlesip, jedel-tergeý is-sharalaryn júrgizý barysynda Qazaqstan Respýblikasy arqyly ótken geroinniń iri partiiasy “tranzitiniń” jolyn kesti, – dep habarlaidy "Ult aqparat" Polisia.kz portalyna silteme jasap.
"Biyl shilde aiynda Pavlodar – Omby baǵytyndaǵy avtojolda arnaiy maqsattaǵy bólimshe jaýyngerleriniń kúshtik qoldaýymen júk kóligin tizgindegen 54 jastaǵy Qyrǵyzstan Respýblikasynyń azamaty ustaldy. Kóliktiń Volvo markaly tirkemesinde Qyrǵyzstannan Reseige jetkizilýi tiis qarbyzben qosa, 59 kilogramm “geroin” salynǵan 21 polietilendi orama jáne 10 kilogramm “gashish” salynǵan eki orama anyqtalyp, tárkilendi", – dedi IIM esirtki qylmysyna qarsy is-qimyl departamenti bastyǵynyń orynbasary Asqar Muhametqaliev.
Bul - shamamen 250 myń bir rettik doza, onyń qara naryqtaǵy quny 2,5 million dollardan asady.
Atalǵan derekke qatysty QR QK-niń 286-baby 4-bóligi boiynsha sotqa deiingi is júrgizý bastalǵan (Ainalymnan alynǵan zattardyń nemese ainalymy shektelgen zattardyń kontrabandasy). Qylmysty uiymdastyrýshyǵa múlki tárkilenip, 20 jylǵa deiin bas bostandyǵynan aiyrý jazasy kózdeledi.
"Qazirgi ýaqytta osy esirtki qylmysynyń ózge qatysýshylary men uiymdastyrýshylaryn, sondai-aq esirtki jetkizýdiń basqa da yqtimal arnalaryn anyqtaý boiynsha jumys júrgizilip jatyr", – dedi Asqar Muhametqaliev.
video: Polisia.kz
