Ishki ister ministriniń orynbasary Aleksei Kalaichidi Qordaidaǵy qaqtyǵys bolǵan kúni politsiia qarý qoldanbaǵanyn málim etti, dep habarlaidy QazAqparat.
«Sol kúni Qordai aýdanynyń Masanchi jáne Sortóbe aýyldaryndaǵy jaǵdaidy turaqtandyrý úshin Merke, Turar Rysqulov jáne Shý aýdandarynan qosymsha kúsh jumyldyrylǵan. Alaida agressivti jastar politsiia qyzmetkerleriniń zańdy talabyn oryndaýdan bas tartyp, olarǵa tas jáne temir zattardy, tipti qarý qoldanyp, belsendi túrde qarsylyq kórsetken», - dedi Aleksei Kalaichidi OKQ-da ótken baspasóz máslihatynda.
Osydan keiin oqiǵa ornyna Ulttyq ulan sarbazdary kelip, túngi eki shamasynda qaqtyǵystyń beti qaitqan.
«Ókinishke qarai, osy qaqtyǵys barysynda 10 adam kóz jumdy. 43 adam aýrýhanaǵa jetkizilgen. Qazirgi tańda aýrýhanada áli de 39 adam jatyr. Zardap shekkenderdiń ishinde bizdiń bes qyzmetkerimiz bar. Úsheýi oqtan jaraqat aldy. Biraq politseiler qarý qoldanbady. Sebebi qaqtyǵys eldimekende ári túngi ýaqytta bolyp jatqan edi. Órt kezinde 25 turǵyn úi, 31 kommertsiialyq nysan men 41 avtokólik zaqymdaldy», - dedi ol.
Qazirgi ýaqytta qaqtyǵysqa qatysqandardyń 2 ańshy qarýy, 2 pistolet pen órteýshi suiyqtyq toltyrylǵan 54 bótelke tárkilengen.
