Foto: elements.envato.com
Ishki ister ministrligi kámeletke tolmaǵan qazaqstandyqtardyń shetelge shyǵý tártibin ózgertpek, - dep habarlaidy Tengrinews.kz.
Ishki ister ministri Marat Ahmetjanov adam saýdasymen ainalysatyndar balalardy halyqaralyq sharalarǵa shaqyrý jeleýimen elden alyp ketetinin aitady.
Josparlanǵan ózgerister týraly Ishki ister ministrligi Uiymdasqan qylmysqa qarsy kúres departamentiniń basshysy Qanat Nurmaǵambetov aitty.
"Is júzinde biz jynystyq jáne eńbek qanaýy, bala asyrap alý maqsatynda jańa týǵan balalardyń saýdasy, adam aǵzalarynyń saýdasy jáne qaiyr suraýǵa májbúrleý siiaqty qylmystarmen betpe-bet kelemiz. Qylmys obektisine ainalatyn kóbine balalar bolǵandyqtan osy másele erekshe nazar aýdarýdy qajet etedi. Sondyqtan 16 jasqa tolmaǵan azamattardyń Qazaqstannan ketý tártibi ózgeredi", - dep túsindirdi ol adam saýdasyna qarsy is-qimyl máseleleri jónindegi forýmda.
Marat Ahmetjanov balalardyń shetelge shyǵýy baqylanatynyn, ata-anasynyń ruqsatynsyz bógde adam balany shetelge ákete almaitynyn aitty.
"Biraq bizde balalardy jalǵan qujatpen nemese aldaý arqyly halyqaralyq is-sharalarǵa aparatyn jaǵdailar kezdesedi. Sodan keiin ony qaitarý qiynǵa soǵady. Munda biz qyraǵylyq tanytyp, olardyń qaida bara jatqanyn, qandai maqsatta ketetinin bilip aldyn-alýymyz kerek", - dep túsindirdi ministr.
