Ishki ister ministriniń orynbasary Igor Lepeha 26 qarashada Astanada ótken zańsyz mitingke qatysty pikir bildirdi, - dep habarlaidy Tengrinews.kz agenttigi.
Resmi málimet boiynsha, 18 adam ustalyp, ákimshilik jaýapkershilikke tartylǵan.
"Olar 15 táýlikke qamaýǵa alyndy. Bul "Jaradaǵy" is-sharada barlyǵy 300-ge jýyq adam boldy (Qorǵaljyn tas jolyndaǵy Zhara mekemesi - esk.). Bir jarym saǵattan keiin Aqordaǵa qarai júrýge shaqyrǵan. Olar syrtqa shyqty, is júzinde mitingtiń barlyq belgisi bar, óitkeni rýpor, úndeý, shaqyrýlar boldy. Olar Aqordaǵa qarai bet aldy. Biz olardy toqtatýǵa, jolyn kesýge májbúr boldyq, uiymdastyrýshy ustaldy. Ol 15 táýlikke ákimshilik qamaýǵa alyndy", - dedi Lepeha Májilis kýlýarynda jýrnalister suraǵyna jaýap berip.
Onyń aitýynsha, mitingke qatysýshylarǵa qatysty qylmystyq is qozǵalmaǵan, tek ákimshilik qamaýǵa alynǵan.
"Biz olardyń talaptaryn kútken joqpyz, óitkeni zańsyz miting óz aldyna ákimshilik quqyq buzý bolyp sanalady. Qazir munymen ainalysyp jatyrmyz, anyqtaimyz", - dedi ministrdiń orynbasary zańsyz mitingige qatysýshylardyń talaptary týraly suraqqa jaýap bere otyryp.
Igor Lepeha mundai aktsiialar elimizdiń basqa aimaqtarynda da ótti degen qaýesetti joqqa shyǵardy. Alaida onyń aitýynsha, Astanadaǵy mitingke Astana turǵyndary ǵana emes, basqa oblystardan kelgen azamattar da qatysqan.
