Egovpress Telegram arnasynyń beinejazbasynan kadr. Foto: Vesti.kz, © Turar Qazanǵapov
Ishki ister ministriniń orynbasary Qairat Sóntaev Astanadaǵy saýda jáne oiyn-saýyq ortalyqtarynyń birinde bolǵan tóbelestiń mán-jaiyn aityp berdi, - dep habarlaidy "Ult aqparat".
Osyǵan deiin áleýmettik jelilerde balasymen júrgen er adamǵa shabýyl jasap, ony judyryqpen urǵan azamattyń kásipqoi boksshy, eks-álem chempiony Beibit Shúmenov ekeni týraly aqparat paida bolǵan edi. IIM vitse-ministri bul derekti rastady.
"Iá, ol - Beibit Shúmenov. Buzaqylyq boiynsha qylmystyq is qozǵaldy, qazir onymen ainalysyp jatyrmyz. Ol jerde qylmys aýyrlyǵy shamaly, saraptamany kútip otyrmyz", - dedi Sóntaev Úkimet kýlýarynda.
Vitse-ministrdiń aitýynsha, bul isti qarap, qylmys quramyn tappaǵan ýchaskelik inspektorǵa qatysty qyzmettik tekserý bastalǵan.
"Qyzmettik tekseris bastaldy, ol qatań jazalanady. Kúni keshe ministr osy máseleni kóterdi, ol jazalanady", - dep sendirdi Sóntaev.
Sondai-aq, jýrnalister vitse-ministrge "soqqyǵa jyqqan adamnyń kásipqoi boksshy bolýy jaýapkershilikti aýyrlata ma" degen saýal qoidy.
"Ol uzaq ýaqyt boiy bokspen ainalyspady, saraptama nátijesi qandai bolatynyn kúteiik", - dep jaýap berdi IIM basshysynyń orynbasary.
Sóntaevtyń sózinshe, tóbeles kezinde Shúmenov saý bolǵan.
"Bala zardap shekken joq, biraq jábirlenýshi qylmystyq is qozǵalýyn talap etip otyr", - dedi vitse-ministr.
Eske sala keteiik, buǵan deiin jelide belgisiz azamattyń qolynda balasy bar er adamdy urǵany kórinetin video tarady. Oqiǵa Astanadaǵy saýda jáne oiyn-saýyq ortalyqtarynyń birinde bolǵan.
Astana TV arnasynyń aqparatynsha, oiyn alańynda eki bala kelispei qalady. Sodan ekeýiniń ákesi janjaldasyp, arty tóbeleske ulasqan. Oqiǵa ornyna kelgen politseiler burynǵy álem chempiony Beibit Shúmenov pen qala turǵyny Azizbek Qadyrovtyń tóbelesip qalǵanyn anyqtaǵan. Bala ustap turǵan er adam jaraqat aldy, ony sot-meditsinalyq saraptamaǵa jibergen.
