Foto: ©️ Tengrinews.kz / Turar Qazanǵapov
Ishki ister ministrligi Ulttyq ulan áskeri qyzmetshisiniń qazasyna bailanysty málimdeme jasady, – dep habarlaidy "Ult aqparat" Polisia.kz portalyna silteme jasap.
IIM baspasóz qyzmeti málimetinshe, 9 qazanda túngi saǵat 01:00-de Ulttyq ulan 6636 áskeri bóliminiń merzimdi áskeri qyzmetshisi - qatardaǵy Sultanov kezekshi bólimsheniń quramynda bola tura, bekitilgen shtattyq qarýdan óziniń basyna jaraqat salyp, saldarynan qaza bolǵan.
"Osy fakt boiynsha Ortalyq óńirlik áskeri-tergeý basqarmasy ózin-ózi óltirýge deiin jetkizý faktisi boiynsha sotqa deiingi tergep-tekserýdi bastady, ony tergeý tájiribeli qyzmetkerlerden qurylǵan jedel-tergeý tobyna tapsyryldy.
Qazirgi ýaqytta oqiǵa orny qaralyp, sot-meditsinalyq saraptamasy taǵaiyndaldy. Aiǵaqtar, atap aitqanda qaza tapqan áskeri qyzmetshiniń uialy telefony men beinebaqylaý kameralarynyń jazbalary alyndy. Tergeý barysynda qatardaǵy Sultanovtyń oqiǵa ornynda jalǵyz bolǵany anyqtaldy.
Oqiǵanyń barlyq mán-jaiyn anyqtaý jáne tergeýdiń jan-jaqtylyǵyn qamtamasyz etý úshin Sultanovtyń áskeri áriptesterinen, onyń komandirlerinen, basqa adamdardan jaýap alý, sondai-aq tiisti keshendi saraptamalyq zertteý sharalary júrgizilip jatyr. Jábirlenýshi jaqtyń ýájderi de tolyq tekseriledi.
Aldyn-ala tergeý nátijeleri boiynsha oqiǵaǵa quqyqtyq baǵa beriledi. Tergeý barysy erekshe baqylaýda", – dedi QR IIM áskeri-tergeý departamentiniń bastyǵy Serikbai Qusaiynov.
Budan ózge aqparat tergeý múddesinde Qylmystyq-protsestik kodekstiń 201-babyna sáikes jariia etilmeidi.
