Foto: Polisia.kz
IIM Aqmola oblysynyń kenderinde quramynda altyny bar materialdardyń zańsyz ainalymyna qatysy bar zańsyz ken qazýshylardyń áreketin toqtatý boiynsha júieli jumys júrgizip keledi, – dep habarlaidy «Ult aqparat» Polisia.kz–ke sileme jasap.
Biyl politsiia qyzmetkerleri 400-den astam zańsyz ken qazýshylardy ustap, jaýapkershilikke tartty. Segiz qylmystyq is tirkeldi. Sondai-aq top bolyp áreket etetin ken qazýshylardyń brigadalary anyqtalyp, joly kesildi.
Osyndai uiymdasqan top biyl qańtar aiynda Aqmola oblysy PD uiymdasqan qylmysqa qarsy kúres basqarmasymen ustalyp, kendi qaita óńdeitin zańsyz tseh joiyldy. Salmaǵy 600 kg-nan astam quramynda altyny bar 26 qap tárkilendi.
Sáýir aiynda Stepnogorsk qalasy prokýratýrasynyń úilestirýimen uiymdasqan qylmysqa qarsy kúres bólinisi altyn urlaýmen ainalysqan úsh zańsyz ken qazýshy brigadanyń jolyn kesti.
– Kendi qaita óńdeitin úsh shaǵyn tseh, segiz tonnadan astam quramynda altyny bar kontsentrat, kontrafaktilik zergerlik buiymdardyń ondaǵan jiyntyǵy tárkilendi. Shahtanyń 200 metr tereńdiginde jerasty jýý tsehy tabyldy. Politsiiaǵa 20-dan astam adam jetkizildi. Tergeý jalǵasýda, – dedi IIM uiymdasqan qylmysqa qarsy kúres departamentiniń ókili Qýandyq Alpys.
26 mamyrda Aqsý jáne Bestóbe eldi mekenderinde jedel-izdestirý is-sharalaryn júrgizý kezinde taǵy úsh jerasty ken óńdeý tsehy tabyldy.
– Ár túrli jabdyqtar, shamamen 300 qap ken tárkilendi. Qylmystyq shemanyń uiymdastyrýshylary men qyzmetkerleri ustaldy. Bul baǵyttaǵy jumys jalǵasýda jáne erekshe baqylaýda, – dedi Qýandyq Alpys.
