Qazaqstannyń Oslodaǵy Elshiligi Ekinshi dúniejúzilik soǵys kezinde okkýpatsiiada bolǵan Norvegiiada tutqynda qaza tapqan qazaqstandyq jaýyngerlerdiń jańartylǵan tizimin jariialady, dep habarlaidy "Ult aqparat".
Sońǵy ailarda 18 qazaqstandyq sarbazdyń aty-jóni men jerlengen jeri anyqtaldy. Búgingi tańda esimderi belgili qazaqstandyq soldattardyń jalpy sany - 74 adam.
Sarbazdar Almaty qalasy, Aqmola, Aqtóbe, Almaty, Jambyl, Qyzylorda, Soltústik Qazaqstan, Túrkistan jáne Shyǵys Qazaqstan oblystarynyń týmalary nemese sol óńirlerden áskerge shaqyrylǵan.
Jaýyngerlerdiń beiitteri Sanneshoen (Tjøtta sovjetiske krigskirkegård), Lillehammer (Jørstadmoen), Bergen (Åsane kirkegård) jáne Tronheim (Støren kirkegård) qalalarynyń janyndaǵy keńestik áskeri zirattarda ornalasqan.
Tizimde sarbazdyń týǵan jyly men mekeni, áskerge shaqyrý, qyzmet etý, tutqyndalýy, qaitys bolýy datalary jáne jerlengen jeri, týystary týraly málimetter, sondai-aq qolda bar qujattarǵa siltemeler berilgen. Tizim «Falstad ortalyǵy» (Norvegiia), Qazaqstan aýmaǵynan shaqyrylyp Uly Otan soǵysy kezinde qaza tapqan nemese habarsyz ketken áskeri qyzmetshiler týraly «Memorial» derekter banki, sondai-aq Reseilik «Memorial» jiyntyq derekter banki siiaqty birneshe derekter kózderinen alynǵan aqparatty salystyrý arqyly jasaldy.
Qaza tapqan sarbazdardyń kóbisi bir nemese eki ǵana málimetter bazasynda kórsetilgeni izdeýdi qiyndatady. Kóptegen jaǵdaida soldat esimi men geografiialyq ataýlardyń burmalanyp jazylýy problemasy da bar.
Búgingi kúnge deiin Norvegiiada jerlengen keńestik áskerilerdiń shamamen 15 500 sany týraly belgili bolyp, olardyń 7000-ǵa jýyǵynyń esimderi anyqtaldy.
Elshilik jariialanǵan aqparat sarbazdardyń urpaqtaryn, týystary men jaqyndaryn tabýǵa kómektesedi, zertteýlerdi odan ári júrgizýge jáne soldattardy máńgi este qaldyrýǵa úles qosady dep úmittenedi.
1941-1945 jyldary Norvegiiada jerlengen keńestik qazaqstandyq jaýyngerleriniń tizimin (2022 jylǵy sáýirdegi jaǵdai boiynsha) myna siltemeden alýǵa bolady.
Foto: Lillehamerdegi Iorstadmoen Keńestik áskeri zirattaǵy eskertkish
