Reseidiń halyq ártisi, kompozitor ári prodiýser Igor Krýtoi qazaqstandyq jas ánshi Erjan Maksimge óziniń mýzykalyq akademiiasyna oqýǵa túsip, bilimin shyńdaýdy usyndy, dep habarlaidy "Ult aqparat".
Bul jaily jas ánshi Instagram-daǵy óz paraqshasynda jazdy.
«Dostar, Máskeýge jasaǵan saparym sátti boldy. Nege deisiz ǵoi. Men eń aldymen, elimizdiń atpaldai azamaty Imanǵali Nurǵaliulymen kezdestim. Sol kezdesýimizdiń nátijesi retinde kópten beri armandap júrgen ataqty kompozitor, prodiýser Igor Krýtoimen tanystym. Stýdiiada tyńdaǵan maestro meni unatyp, óziniń mýzykalyq akademiiasyna shaqyrdy. Men qýana kelistim. Endi, dostar, kúzden bastap sol jerde vokal baǵyty boiynsha ónerimdi shyńdaityn bolamyn. Árine, munyń barlyǵy Imanǵali aǵamyzdyń arqasy dep bilemin. Osyndai azamattardyń arqasynda shyǵarmashylyǵym jalǵasyp, jemisin beretinine senimim mol», - dep jazdy Erjan.
Eske sala ketsek, keshe Máskeýde Resei Federatsiiasyndaǵy Qazaqstan Respýblikasynyń Tótenshe jáne Ókiletti elshisi Imanǵali Tasmaǵambetov jas ánshi Erjan Maksimmen kezdesken bolatyn. Diplomatiialyq ókildikten habarlaǵandai, Reseidegi Qazaqstan elshiliginde ótken kezdesý barysynda qazaqstandyq jas ánshiniń shyǵarmashylyq jospary talqylandy. Erjan «Golos. Deti» jobasyna qatysqannan keiin ómirinde qandai ózgeris bolǵanyn jáne aldaǵy ýaqytta nemen ainalysýdy josparlap júrgenin aitty.
Aita keteiik, ótken aida Reseidiń birinshi arnasyndaǵy «Golos. Deti» konkýrsynda Erjan Maksim ekinshi oryn ielengen bolatyn.
Ánshiniń anasy Gúlmira Álibek onyń elordada bilim alǵysy keletinin aitqan edi. «Ministr qabyldaý kezinde Erjanǵa «Shabyt» óner akademiiasy janynan grant bólinetindigin jetkizdi. Endi 8 mamyrda Qazaq ulttyq óner ýniversitetiniń rektory Aiman Musaqojaevanyń qabyldaýynda bolyp, máseleni odan ári talqylaimyz», - degen edi Gúlmira Álibek.
Igor Krýtoi buǵan deiin Dimash Qudaibergenmen tandemde óner kórsetip, qos eldiń maqtanyshy Resei aýditoriiasyn baýrap alǵan bolatyn. Krýtoidyń súiemeldeýimen Dimash «Liýbov ýstavshih lebedei» ánin Máskeýdegi Kreml saraiynda Resei Federatsiiasynyń Ishki ister organdarynyń qyzmetkerleri kúnine arnalǵan kontsertte shyrqaǵan edi. Al 8 sáýir kúni jas talant Reseidiń Halyq ártisi, ánshi Alla Pýgachevanyń merekelik keshinde án aitty.
