Otbasy bankiniń basshysy Liazzat Ibragimova baspana baǵasyna boljam jasady, dep habarlaidy Sputnik Qazaqstan.
"Jartyjyldyń qorytyndysy boiynsha baspana baǵasynyń ósýi tejeledi dep oilaimyn. Biraq jahandyq turǵyda baǵa tómendemeidi. Oǵan pandemiianyń áseri jáne álemdik infliatsiia siiaqty jahandyq faktorlar jol bermeidi. Qazirgi kezde azyq-túlik qana emes, qurylys materialdary da barlyq jerde qymbattady", - dedi Ibragimova ortalyq kommýnikatsiialar qyzmetinde ótken brifingte.
Osy oraida bank basshysy baspana baǵasyna áser etken birneshe faktordy atap ótti. Birinshiden, pandemiia. Odan keiin demografiia.
"Byltyr bizde 450 myń bala dúniege kelgen. Bul – absoliýttik rekord, óte jaqsy kórsetkish. Demek, qazaqstandyqtar bolashaqqa senedi. Olardyń barlyǵy baspanasyn keńeitedi, ia bolmasa, ata-anasynan bólek shyǵady", - deidi bank basshysy.
Úshinshi faktor – koronavirýstyń áseri. Pandemiia kezinde adamdar úide jumys isteýge bolatynyn túsindi. Al tórtinshi faktor – zeinetaqy jinaǵynyń bir bóligin merziminen buryn paidalaný.
"Zeinetaqy jinaǵyn paidalanýdyń áseri tórtten bir bóligin alyp otyr dep oilaimyn. Sondyqtan osy múmkindik bolmaǵan kúnniń ózinde baspana baǵasy kóteriletin edi. Menińshe, shildege deiin jyljymaityn múlik baǵasynyń ósý qarqyny qalai baiaýlaǵanyn kóremiz. Al jyl sońynda turǵyn úi naryǵynda baǵa turaqtylyǵy bolady", - dep atap kórsetti Ibragimova.
Bank basshysy qazaqstandyqtardyń kókeiinde júrgen suraqqa da jaýap berdi. Búginde zeinetaqy jinaǵynyń bir bóligin merziminen paidalaný azaiǵannan keiin turǵyn úi baǵasy kúrt tómendeidi degen pikir bar.
"Baǵanyń qulaǵanyn kútý kerek deidi. Biraq buǵan deiin aitqan úsh faktordy da eskergen durys. Negizgi faktor - álemdik infliatsiia. Sondyqtan sarapshy retinde baǵa tómendeidi dep aita almaimyn", - dedi Ibragimova.
