Túrkistan oblysynyń ákimi Janseiit Túimebaev «High Vill Kazakhstan» JShS-niń Bas direktory Kang Djon Demen kezdesti, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Basqosýda taraptar oblys ortalyǵynda turǵyn úi keshenin salý máselesin talqylady.
Kezdesýde aimaq basshysy Túrkistan qalasynyń damýy Elbasynyń erekshe nazarynda ekenin jáne munda qurylys jumystarymen ainalysatyn merdiger kompaniialarǵa ákimdik tarapynan barynsha qoldaý kórsetiletinin aitty.
«Memleket basshysynyń tapsyrmasymen oblys ortalyǵyn erekshe úlgide qalyptastyrýdy kózdep otyrmyz. Sondyqtan munda salynatyn árbir ǵimarattyń sáýleti men sánine erekshe mán berilýde. Búginde tiisti jumystar atqarylýda. Atap aitsaq, «Riksos» qonaqúii men ákimshilik ortalyqtyń kapsýlasy salyndy. Osy rette, sizderdiń de osynda zamanaýi úlgidegi turǵyn úi keshenin salatyndaryńyzǵa úlken senim bildiremin. Al, qurylys jumystary júrgiziletin aýmaqtaǵy barlyq infraqurylym máseleleri ákimdik tarapynan óz sheshimin tabatyn bolady. «High Vill Kazakhstan» seriktestigi – ázirge qalamyzda turǵyn úi keshenin salatyn birinshi jáne jalǵyz kompaniia. Aita keterligi, qurylys jumystaryn meilinshe erte bastap, 1 jyldyń ishinde aiaqtaý kerek», – dedi Janseiit Qanseiituly.
Óz kezeginde Kang Djon De turǵyn úi keshenin salý úshin jer ýchaskesi anyqtalsa, qurylysty bastap ketýge daiyn ekenin jetkizdi.
«Biz 5-10 gektarǵa aýmaqqa jańa zamanaýi keshen salýdy josparlap otyrmyz. Bul joba oblys ortalyǵynyń jańa kelbetine kórik beretin bolady. Jýyq arada barlyq qujattamany ázirlep, qurylys jumystaryna kirisemiz»,- dedi ol.
«Haivill Qazaqstan» kompaniiasynyń bas direktory Djon De Kang Túrkistan qalasynda túrli áleýmettik nysandar men kópqabatty úiler salýǵa nietti ekenin bildirdi. Kezdesýde oblys ákimdigi men kompaniia basshylyǵy aldaǵy ýaqytta da kelissózderdi jalǵastyrý jóninde ýaǵdalasty. Jiynnan soń koreialyq kompaniia ókilderi Túrkistan qalasyn damytý jónindegi jobalar men josparlarmen tanysty.
