Almatyda Halyk Arena sport kesheni bazasynda koronavirýstyq infektsiiamen aýyrǵandarǵa ýaqytsha gospital ashylady. Qazir sport saraiynda daiyndyq jumystary júrip jatyr, dep habarlaidy QazAqparat.
«Halyk Arena bazasynda infektsiialyq statsionar oryndaryn ashý májbúrlikten týǵan sheshim. Aýrýhanalarda oryn jetpegendikten, osyndai qadamǵa baryp otyrmyz. Osyndai qiyn ýaqytta qala qyzmetterine kómek kórsetýimiz kerek. Bul shara kóptegen azamattardyń ómirin saqtap qalýǵa kómektesedi dep senemiz», - dedi sport saraiynyń «M-Line Property Management» basqarýshy kompaniiasynan.
Qazir sport saraiynda jumys istep turǵan sport sektsiialary, Halyk Arena keshenin jalǵa alýshylar ýaqytsha Almaty Arena keshenine kóshedi. «Sportshylarǵa daiyndyq kezeńin úzýge bolmaidy. Sondyqtan, sport keshenin jalǵa alýshylardyń Almaty Arena keshenine kóshýin qarastyrýdy suradyq», - dedi olar.
Basqarýshy kompaniia ókilderi sport keshenin ózgertýge barynsha muqiiat bolǵanyn aitty.
«Sport nysanyn gospitalge ainaldyrý tek oryn bosatý emes, qajetti mikroklimat jasaý, sanitarlyq aimaqtar túzý, bólmelerdiń jeldetilýin, tazalyǵyn qamtamasyz etý bolyp otyr. Basqarýshy kompaniia sport nysanynyń qaita óz profiline eshbir nuqsansyz aýysýyna kepil bolady», - dedi kompaniiadan.
Aita ketý kerek, buǵan deiin qalalyq Qoǵamdyq densaýlyq basqarmasynyń basshysy Kamaljan Nadyrov Almatyda koronavirýs boiynsha epidemiologiialyq ahýal kúrt nasharlasa, HalykArena jáne Almaty Arena sport keshenderi bazasynda infektsiialyq statsionar ashylatynyn habarlaǵan bolatyn.
