Qoja Ahmet Iasaýi atyndaǵy Halyqaralyq qazaq-túrik ýniversitetinde Túrkistan aimaǵynda ǵylymdy damytý maqsatynda Qazaqstan jaratylystaný ǵylymdary ulttyq akademiiasy Tóralqasynyń keńeitilgen kóshpeli májilisi ótkizildi, dep habarlaidy "Ult aqparat" HQTÝ-diń ǵylymi jumystardy uiymdastyrý bólimine silteme jasap.
Aita ketetin jait, QR Prezidentiniń Jarlyǵymen Túrkistan oblysynyń qurylýyna sáikes Qazaqstan Ulttyq jaratylystaný akademiiasynyń Ońtústik Qazaqstan filialy Túrkistan filialy bolyp qaita ózgertildi. Filialdyń qyzmeti aimaqtyq ýniversitetter men iri ǵylymi ortalyqtar negizinde uiymdastyryldy.
Jiyndy Qazaqstan Ulttyq jaratylystaný akademiiasynyń prezidenti Nurtai Ábiqaev ashyp júrgizip otyrdy. Sonymen qatar májiliske, Memlekettik qyzmet salasyndaǵy óńirlik habtyń basqarýshy komitetiniń tóraǵasy Álihan Baimenov qatysty.
Májiliste ýniversitet prezidenti Bolatbek Abdrasilov, QR Prezidenti N.Á.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýy aiasynda Túrkistan oblysy ǵylymynyń damýy men bolashaǵy týraly baiandama jasady. Jasalǵan baiandamaǵa qonaqtar oń baǵasyn berip, suraqtar joldady. Aitylǵan usynys-pikirlerdi qoldaityndyqtaryn bildirip, birlese jumys jasaý arqyly maqsatqa qol jetkizýge bolatyndyǵyn aitty.
Sondai-aq, jiyn barysynda ǵylymi-tehnikalyq baǵdarlamalar men ǵylymi izdenister, týristik baǵytty damytý taqyrybynda baiandamalar jasalyp, slaid arqyly túsindirildi.
Jiyn sońynda májilis músheleri Túrkistan aimaǵynda ǵylymdy damytýǵa barynsha úles qosatyn bolyp ýaǵdalasty. Qazaqstan Ulttyq jaratylystaný ǵylymdary akademiiasy men Qoja Ahmet Iasaýi atyndaǵy Halyqaralyq qazaq-túrik ýniversiteti ózara yntymaqtastyq týraly memorandýmǵa qol qoidy.
