2-4 shilde aralyǵynda Qazaqstan Respýblikasy Premer-Ministriniń orynbasary Gúlshara Ábdiqalyqova Ázerbaijan Respýblikasyna jumys saparymen bardy, dep habarlaidy QazAqparat.
Sapar barysynda Ázerbaijan Premer-Ministri Novrýz Mamedovpen kezdesý ótti. G. Ábdiqalyqova Qazaqstandaǵy prezident sailaýynyń nátijeleri, jańa Memleket basshysy Q. Toqaevtyń syrtqy jáne ishki saiasatynyń basymdyǵy jáne olardyń Elbasy N. Nazarbaevtyń baǵytymen sabaqtastyǵy, «Rýhani jańǵyrý» baǵdarlamasynyń, «Uly dalanyń jeti qyry» basym baǵyttarynyń júzege asyrylýy týraly baiandady. Ázerbaijan Úkimetiniń basshysy 2019 jylǵy qazan aiynda Nur-Sultan qalasynda ótetin qalalyq týrizm boiynsha segizinshi Jahandyq sammitke shaqyryldy.
Sondai-aq, vitse-premer Ázerbaijannyń Mádeniet ministri Abýlfaz Garaevpen kezdesti. Taraptar mádenietaralyq dialog, tarihi-mádeni murany saqtaý, birlesken mádeni-rýhani jobalardy ilgeriletý salasyndaǵy ekijaqty yntymaqtastyqty keńeitýge ýaǵdalasty.
Odan ári vitse-premer Ázerbaijannyń Jazýshylar odaǵyna baryp, eldiń kórnekti ziialy qaýym ókilderimen kezdesti. Kezdesýde Halyq jazýshysy A. Rzaev, Ázerbaijan «Pen» Klýbynyń prezidenti, Halyq jazýshysy Ch. Abdýllaev, Halyq ártisi, kinorejisser O. Mirkasimov jáne G. Aliev atyndaǵy «Ázerbaijan-Qazaqstan» dostyq qoǵamynyń prezidenti, professor E. Giýnaidyn boldy.
G. Ábdiqalyqova suhbattasýshylardy Úshinshi jańǵyrý aiasynda Qazaqstanda júrip jatqan ózekti úrdistermen tanystyrdy. Ózgerýlerdiń negizi qoǵamnyń rýhani jańǵyrýy bolyp tabylatynyn atap ótti. Tilderi men mádenieti jaqyn, ortaq túrki tamyry bar eki el arasyndaǵy gýmanitarlyq bailanystardy damytý boiynsha pikir almasý oryn aldy.
Sapar aiasynda vitse-premer Bakýde ótip jatqan IýNESKO-nyń Dúniejúzilik mura komitetiniń 43-shi sessiiasyna qatysty.
Plenarlyq otyrysta sóilegen sózinde qazaqstandyq delegatsiia basshysy Komitet múshelerin elimizdegi tarihi-mádeni muralardy, atap aitqanda Qoja Ahmet Iasaýi kesenesiniń qorǵalýy týraly habardar etti. Vitse-premer Túrkistan qalasyn damytýdyń jańa jospary onyń oblys ortalyǵy mártebesin alýmen bailanysty qabyldanǵanyn jáne sany artyp kele jatqan qala turǵyndarynyń, týristerdiń qajettilikterin qanaǵattandyrýǵa baǵyttalǵanyn atap ótti. Ol qujat IýNESKO talaptaryna sáikes ázirlengenin jáne keseneniń joǵary halyqaralyq mártebesin eskeretinin atap ótti.
