QR Parlamenti Májilisiniń depýtaty Gúlshara Ábdiqalyqova Májilistiń Áleýmettik-mádeni damý komitetiniń tóraiymy bolyp sailandy, dep habarlaidy QazAqparat.
Onyń kandidatýrasyn QR Parlamenti Májilisiniń tóraǵasy Nurlan Nyǵmatýlin usyndy.
«QR Parlamenti Komitetteri men komissiialary týraly zańnyń 8-babyna sáikes, men osy orynǵa Gúlshara Naýshaqyzy Ábdiqalyqovanyń kandidatýrasyn usynamyn. Gúlshara Naýshaqyzy kóptegen laýazymdy qyzmetterdi abyroimen atqardy. Barlyq salada bilimi de, tájiribesi de jetkilikti. Sondyqtan, osy komitetti basqarý úshin Gúlshara Ábdiqalyqova laiyqty dep esepteimin», - dedi Nurlan Nyǵmatýlin Májilistiń jalpy otyrysynda.
Gúlshara Ábdiqalyqovanyń kandidatýrasyn barlyq depýtattar maquldady.
Aita keteiik, buǵan deiin QR Parlamenti Májilisiniń jańa depýtattary - Gúlshara Ábdiqalyqova Nurjan Áshimbetov jáne Juldyz Omarbekova ant berdi.
Depýtattyq mandatqa deiin Gúlshara Ábdiqalyqova QR Premer-Ministriniń orynbasary bolǵan edi. Ol 1965 jyly 15 mamyrda Qyzylorda oblysynda týǵan. 1987 jyly Jambyl jeńil jáne tamaq ónerkásibi tehnologiialyq institýtyn ekonomist mamandyǵy boiynsha támamdaǵan.
1987-1994 jyldary Qyzylorda oblystyq halyqty áleýmettik qorǵaý basqarmasynda aǵa inspektor, bólim bastyǵy bolyp jumys istegen. 1994-1995 jyldary – QR Joǵarǵy keńestiń halyqty áleýmettik qorǵaý komitetiniń konsýltanty, 1995-2003 jyldary Eńbek jáne halyqty áleýmettik qorǵaý ministrliginde bólim bastyǵy, basqarma bastyǵynyń orynbasary, zeinetaqymen qamtamasyz etý basqarmasynyń bastyǵy, áleýmettik qamtamasyz etý departamenti direktorynyń orynbasary, áleýmettik qamtamasyz etý jáne áleýmettik kómek departamentiniń direktory, zeinetaqymen qamtamasyz etý jáne halyqtyń kirisin retteý departamentiniń direktory laýazymdarynda jumys istedi.
2003-2005 jyldary – Eńbek jáne halyqty áleýmettik qorǵaý vitse-ministri, 2005-2006 jyldary – «Ómirdi saqtandyrý kompaniiasy – Memlekettik annýitettik kompaniia» AQ basqarmasynyń tóraiymy, 2006-2007 jyldary – Eńbek jáne halyqty áleýmettik qorǵaý vitse-ministri, 2007-2008 jyldary – Eńbek jáne halyqty áleýmettik qorǵaý ministrliginiń jaýapty hatshysy, 2008-2009 jyldary – prezidenttiń keńesshisi, prezident janyndaǵy Áielder isteri jáne otbasylyq-demografiialyq saiasat jónindegi komissiianyń tóraiymy, 2009-2012 jyldary – Eńbek jáne halyqty áleýmettik qorǵaý ministri, 2012-2013 jyldary – prezidenttiń keńesshisi, 2013-2014 jyldary – premer-ministrdiń orynbasary; 2014-2019 jyldary – Qazaqstannyń Memlekettik hatshysy bolǵan.
