Qazaqstan Respýblikasynyń Memlekettik hatshysy Gúlshara Ábdiqalyqova Birikken Arab Ámirlikteriniń memleket qairatkerlerimen, azamattyq qoǵam kóshbasshylarymen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Birikken Arab Ámirlikterine Qazaqstannyń kásipker áielderiniń delegatsiiasyn bastap barǵan Gúlshara Ábdiqalyqova osy eldiń memleket qairatkerlerimen, azamattyq qoǵam kóshbasshylarymen birqatar eki jaqty kezdesýler ótkizdi.
Memlekettik hatshy Birikken Arab Ámirlikteri Áielder bas keńesiniń tóraiymy sheiha Fátima bint Mýbarakpen kezdesýde eki el áielderiniń biznes-qoǵamdastyǵy yntymaqtastyǵynyń basymdyqtaryn, memlekettik otbasylyq saiasatty, ana men balany qorǵaý, áielderdiń quqyqtary men múmkindikterin keńeitý máselelerin qarastyrdy.
G.Ábdiqalyqova Saýda-ónerkásip palatalary federatsiiasynyń tóraǵasy Muhammed Tani ar-Rýmeisimen júzdesip, taraptar elderimizdiń saýda-ekonomikalyq jáne investitsiialyq bailanystarynyń deńgeiin odan ári arttyrý, azyq-túlik qaýipsizdigin qamtamasyz etý máselelerin talqylady. Memlekettik hatshy Qazaqstan-Ámirlikter biznes-sammiti barysynda qol qoiylǵan «Atameken» UKP Isker áielder keńesi men BAÁ Isker áielder keńesi arasyndaǵy yntymaqtastyq týraly memorandýmda ekijaqty iskerlik bailanysty ártaraptandyrý, biznes-missiialar almasý, túrli iskerlik is-sharalarǵa qatysý jónindegi birlesken naqty qadamdar qarastyrylǵanyn atap ótti.
Jumys saparynyń sońynda Memlekettik hatshy Gúlshara Ábdiqalyqova UN Women ókildiginiń direktory Moza ásh-Shehhimen júzdesti. Kezdesýde áielderdiń jaǵdaiyn jaqsartý, áielder kásipkerligin damytý, genderlik teńdikti ilgeriletý máseleleri talqylandy.
Qazaqstan delegatsiiasy sondai-aq Dýbaidyń «Aqyl-oi birligi arqyly - bolashaqty jasaimyz» atty EHRO-2020 halyqaralyq kórmesine daiyndyǵymen tanysty.
