Aqyn, QR Memlekettik syilyǵynyń laýreaty Gúlnár Salyqbai Memleket basshysy Qasym-Jomart Toqaevtyń málimdemesine orai pikir bildirdi, dep habarlaidy QazAqparat.
«Búgingi qiyn jaǵdaida bir jaǵadan bas, bir jeńnen qol shyǵaryp, yntymaqtasa ómir súrmesek bolmaidy. Menińshe, elimizde indetke qarsy sharalar der kezinde qolǵa alyndy. Úlken qalalar erterek jabylyp, aýrý basqa óńirlerge kóp tarala qoiǵan joq. Mundai adamzat ómiri synǵa túsken kezeńde halyqqa eń aldymen memleket qamqorlyǵy kerek. Kóp jumystar istelip jatyr. Ony kórip te, sezip te otyrmyz. Prezident Qasym-Jomart Toqaevtyń 31 naýryzdaǵy málimdemesi el basyna kún týǵan kúrdeli kezeńde qinalǵan jurttyń kóńiline dem bergen altynkúrek jelindei boldy. Talai azapty bastan ótkergen elmiz ǵoi. Budan da ótermiz. Tek sabyrly bolaiyq», - deidi aqyn.
Sondai– aq, ol qazaqstandyqtardy Covid -19 koronavirýs infektsiiasyn saq bolýǵa shyqyrdy.
«Qazir búkil álem tyǵyryqqa tirelip tur. Tipti adam balasyn ǵaryshqa ushyryp, ertegini shynǵa ainaldyrǵan ǵylym men tehnika da sharasyz. Jer sharyn túgel qamtyǵan daýasyz dert aýyzdyq bermei, kún saiyn qansha adamnyń ómirin jalmap, órship barady. Dúniejúzindegi jaǵdaidy túgel alaqandaǵydai kórip otyrmyz. Esin tez jiyp, esik-terezesin qymtap úlgirgender durystala bastady, al endi qalypty tirshiliginen tanbai, bul derttiń qaýiptiligin moiyndaǵysy kelmegender qatty qinalyp jatyr. Sondai orny tolmas ókinishte qalmas úshin abai bolaiyq, saq bolaiyq»,– deidi Gúlnár Salyqbai.
«Baýyrjan Momyshulynyń «Tártip tán úshin, yntymaq jan úshin kerek» degen sózi bar. Bul qurdymnan bizdi tek tártip, bir birimizge degen janashyrlyq pen tilektestik qana alyp shyǵa alady»,– dep túiindedi ol.
Aita keteiik, keshe Prezident Qasym-Jomart Toqaev respýblikalyq telearnalar efirinen málimdeme jasaǵan bolatyn.
.jpeg)