Foto: QR MAM
Roza Baǵlanova atyndaǵy «Qazaqkontsert» memlekettik akademiialyq kontserttik uiymynyń «Gúlder» ansambliniń balet ártisi Saniia Sákenova men bas baletmeister Anvara Sadyqova 2025 jyldyń 24-27 sáýiri aralyǵynda ótken XVIII «Riga kóktemi – 2025» halyqaralyq horeografiialyq baiqaýyna qatysyp júldeger atandy, dep habarlaidy Ult.kz.
Baiqaý horeografiianyń úsh atalymy boiynsha ótti. Atap aitsaq, klassikalyq bi, halyq bii jáne zamanaýi horeografiia. Baiqaýǵa Qazaqstannan bólek Germaniia, Italiia, Latviia, Litva, Estoniia, Ýkraina, Soltústik Afrika elderinen ónerpazdar qatysty.
Ansambl solisi Saniia Sákenova I dárejeli laýreat atanyp, eki altyn medal jeńip aldy. Ol baiqaý baǵdarlamasynda Anvara Sadyqova qoiǵan «Aqbaian» qazaq biin jáne Ernur Qaryqbol qoiǵan «Temýlen» mońǵol biin biledi. Sondai-aq, ansambl bishisi oryndaýshylyq sheberligi men ártistik óneri úshin Amerika Qurama Shtattaryndaǵy Margo Fontein atyndaǵy Balet akademiiasynda eki aptalyq oqý stipendiiasynyń sertifikatyna ie boldy.
«Gúlder» ansambliniń bas baletmeisteri Anvara Sadyqova men Saniia Sákenova Margo Fontein balet akademiiasynyń kórkemdik jetekshisi Kennet Laddenniń arnaiy shaqyrtýyn aldy.
Sonymen qatar, qazylar alqasynyń sheshimi boiynsha «Gúlder» ansambli «Ulttyq bi mádenietin saqtaý jáne damytý» arnaiy syilyǵymen marapattaldy.
