Ýkraina prezidenti Vladimir Zelenskii Grýziiada burynǵy prezident Mihail Saakashvilidiń ustalǵanyna alańdaýshylyq bildirdi. Kiev Tbilisidi "Ýkraina azamatyn ustap, qamaýynyń sebebin" túsindirýge shaqyrdy, dep jazady Azattyq.
Al juma kúni ustalǵan Saakashvilidiń Facebook paraqshasynda Ýkraina depýtaty Elizaveta Iaskomen aradaǵy qarym-qatynasy jóninde habarlama shyqty. "Biz bul videony Grýziiaǵa ketpei turyp jazdyq. Grýziia men Ýkraina birge. Qamalǵan jaǵdaida jariialaimyz dep keliskenbiz" delingen video sipattamasynda.
"Liza ekeýimiz jańa ómir, jańa otbasyn quratynymyzdy habarlaýdy jón kórdik" dedi Saakashvili videoda.
Juma, 1 qazanda Grýziia premer-ministri Iraklii Garibashvili shuǵyl brifing ótkizip, eldiń úshinshi prezidenti Mihail Saakashvilidiń arnaiy operatsiia kezinde ustalǵanyn habarlady.
Garibashvilidiń aitýynsha, grýzin arnaiy jasaǵy burynǵy prezidenttiń Ýkrainadan Grýziiaǵa qarai jol tartýyn ańdyp, izine túsken. Artynsha Rýstavi túrmesine qamaǵan.
Kóp keshikpei Saakashvilidiń ashtyq jariialap, Ýkraina elshisimen kezdesýdi talap etkeni belgili boldy. Bul jóninde Grýziia ombýdsmeni Nino Lomdjariia málimdedi.
Juma kúni Saakashvili qamalǵannan keiin onyń shynymen de Batýmide bolǵany rastaldy. 1 qazanda tańerteń onyń Grýziiaǵa oralǵany jaily videoúndeý taraǵan. Onyń elge qalai kelgeni belgisiz. IIM bastapqyda eks-prezidenttiń shekaradan ótpegenin málimdegen.
Saakashvili segiz jyldan soń elge oralyp otyr.
2013 jyly Tbilisi soty ony "qyzmettik ókiletin asyra paidalanǵany úshin" syrttai 6 jylǵa bas bostandyǵynan aiyrǵan. Osy aptada Grýziia biligi elge oralsa, onyń túrmege qamalatynyn eskertken.
Saakashvili Grýziiaǵa kelmei turyp jariialaǵan videoúndeýlerinde halyqty 2 qazanda astana ortalyǵyna jinalýǵa shaqyrǵan. Senbi kúni Grýziiada jergilikti organ sailaýy ótedi.
Jeksenbi kúni elde Saakashvilidi qoldaǵan iri miting ótetini jaily habar tarady.
