Tbiliside myńdaǵan adam Grýziianyń burynǵy prezidenti Mihail Saakashvilidi qoldap, kóshege shyqty, dep habarlaidy "Ult aqparat" Azattyq radiosyna silteme jasap.
Qazan aiynyń basynda politsiia ony eline kelgen sátte ustap, túrmege otyrǵyzǵan.
BAQ málimetinshe, mitingige shamamen 50 myń adam qatysqan. Olardyń birqatary qolyna "Mishaǵa bostandyq" jáne "Saiasi qýdalaýǵa jol joq" degen plakattar ustap turdy. Demonstratsiia ótpei turyp parlament mańyna arnaiy jasaq mingen avtobýstar qoiyldy.
Kóshege shyqqan halyq Saakashvilidi bosatýdy talap etip, qazirgi úkimetti synǵa aldy.
Saakashvili 2018 jyly Grýziiada syrttai sottalǵan. Sonymen birge oǵan qatysty úsh birdei qylmystyq is qozǵalǵan. Qazir túrmede otyrǵaneks-prezident ashtyq jariialady. Ol qyrkúiekte ózin túrme kútip turǵanyna qaramastan "eldi qutqarý úshin" Grýziiaǵa baratynyn aitqan.
Qazannyń basynda ótken jergilikti sailaý kezinde Saakashvili negizin qalaǵan eldegi negizgi oppozitsiialyq kúsh – "Birtutas ulttyq qozǵalys" basqarýshy "Grýzin armany" partiiasynan jeńilgen. Alaida bilik partiiasy Tbilisi, Batými, Kýtaisi, Poti jáne Rýstavi siiaqty negizgi qalalarda 50-paiyzdyq mejeni baǵyndyra almady. Bul qalalarda sailaýdyń ekinshi týry 30 qazanda ótedi.
Byltyr oppozitsiialyq partiialar "Grýzin armany" jeńgen parlament sailaýynyń ádil bolmaǵanyn aitqannan keiin elde saiasi daǵdarys ýshyqqan.
Grýziiany 2004-2013 jyldary basqarǵan Saakashvili 2018 jyly eki is boiynsha bárin qosqanda 9 jylǵa bas bostandyǵynan aiyryldy. Eks-prezident barlyq aiypty joqqa shyǵaryp, istiń saiasi astary baryn aitqan.
10 qazanda Saakashvilidiń dárigeri Nikoloz Kipshidze burynǵy prezidenttiń jaǵdaiy nasharlaǵandyqtan ony aýrýhanaǵa aýystyrý qajettigin aitqan. Keiin ádilet ministrligi Saakashvilidiń jaǵdaiy "ortasha" dep málimdedi.
