Qazirgi ýaqytta Grýziiada jańa koronavirýs juqtyrǵan 38 adam tirkeldi. Birneshe naýqastyń jaǵdaiy aýyr, sebebi olardyń basqa da aýrýlary bar, dep málimdedi jýrnalisterge Tbilisi juqpaly aýrýlar aýrýhanasynyń bas direktory Tengiz Tsertsvadze. Bul týraly Newsgeorgia saity habarlady.
Tbilisi juqpaly aýrýlar aýrýhanasynda qazirgi ýaqytta 46 naýqas jatyr, onyń 30-ynda koronavirýs zerthanalyq turǵydan rastalǵan. Budan bólek, taǵy jeti naýqasta koronavirýs tabylǵan, olar eldegi basqa klinikalarǵa ornalastyryldy. Bir naýqas jazylyp shyqqan.
«Eki naýqas aýyr halde jatyr, taǵy birneshe adamnyń densaýlyǵy nashar, olar egde jasqa kelip qalǵan jáne basqa da aýrýlary bar. Máselen, qan qysymy joǵary, júregi aýyrady nemese astmasy bar», - dedi Tbilisi juqpaly aýrýlar aýrýhanasynyń bas direktory Tengiz Tsertsvadze.
Aýrýhana direktory qazirgi ýaqytta 11 naýqastyń pnevmoniiaǵa shaldyqqanyn rastady.
«Olardyń jartysynyń jaǵdaiy ortasha aýyr dep baǵalanýda, al basqa naýqastardyń aýrýy jeńil ótýde. Kámelettik jasqa tolmaǵan naýqastardyń densaýlyǵy jaqsy emes, alaida, olardyń indeti jeńil túrde jáne jaǵdaiy qanaǵattanarlyq», - dep málim etti T. Tsertsvadze.
Onyń málimetinshe, premerdiń sheshimi boiynsha Grýziiadaǵy tórt jetekshi klinika naýqastardan tolyq bosatylǵan. «A josparyna» sáikes, 440 jatyn oryn ázirlengen. Taǵy qajet bolǵan jaǵdaida, «B jospary» aiasynda 3600 oryn daiyndalady.
