Áseldiń sýretteri ata-anasynyń qolyna tek bir jyldan keiin tiipti. Áseldiń denesindegi kúiik izderin kórgen anasy aitarǵa sóz tappai otyr.
Grýziiada qaitys bolǵan Ásel Aitbaevaǵa qatysty ata-anasy jańa dáiek keltirdi. Qyzynyń óler aldynda azaptalǵan sýretterin Tbilisidegi quqyq qorǵaýshylar oqiǵa bolǵan kúni túsirgen eken, - dep habarlady Ulysmedia.kz saity KTK telearnasyna silteme jasap.
Biraq Áseldiń sýretteri ata-anasynyń qolyna tek bir jyldan keiin tiipti. Áseldiń denesindegi kúiik izderin kórgen anasy aitarǵa sóz tappai otyr.
"Basynda birde-bir qannyń izi joq. Al denesindegi qyzyl jaralar kúiiktiń izi. Qyzymdy kúidirgen. Qalaisha? Qazaqstan tarapynyń maǵan qulaq aspaitynyna tańǵalamyn. Nege olar saraptama daiyndaýǵa asyqpaidy? Kómekteskisi kelmeidi. Olar ózin-ózi óltirý deidi. Qarańyzdar, sýretten anyq kórinip tur. Bireý óltirip, osy jerge laqtyryp ketken siiaqty. Meniń nusqam osyndai. Qyzym eshqaidan da qulaǵan joq", - deidi marqumnyń anasy Aisulý Aitbaeva.
Sýretpen muqiiat tanysyp shyqqan Áseldiń ata-anasy qyzynyń arqasy, qoly men aiaǵyndaǵy kesilgen izderdi baiqaǵan. Ásirese oń jaǵynda kóp. Grýziianyń sot-meditsinalyq sarapshylary marqumnyń denesindegi jaralar kúlbirep ketken dep anyqtama beripti. Mundai belgi tek kúiikten keiin paida bolady deidi Aisulý Aitbaeva. Onyń boljamynsha, boijetken kópqabatty úidiń balkonynan qulamas buryn ólýi múmkin. Sondyqtan qyzdyń áke-sheshesi Qazaqstan men Grýziia tergeýshileriniń «óldi» degen nusqasymen kelispeidi.
Otandasymyzdyń qazasyna quqyq qorǵaý organdary Grýziia azamaty Besik Tordýany kinálady. Oǵan qyzdy zorlady degen de aiyp taǵyldy. Alaida kúdikti ustalǵannan keiin eki aidan soń túrmede infarkten qaitys boldy. Qazir Ásel Aitpaevanyń ólimine qatysy bar degen kúdikpen jezdesi Murat Meiirbekov qamaýda otyr. Oǵan «adam saýdasy» jáne «zorlaý» baby boiynsha is qozǵalǵan. Sotqa deiingi tergeý-tekserýdiń júrip jatqanyna bir jyldan asty. Búgin aldyn ala sot tyńdalymynyń 7-maýsymda ótetini belgili boldy.
