QR Parlamenti Májilisiniń jalpy otyrysynda depýtattar «Qazaqstan Respýblikasynyń aldyndaǵy Grýziia Úkimetiniń bereshegin qaita qurylymdaý týraly kelisimdi ratifikatsiialaý týraly» zań jobasyn maquldady, dep habarlaidy "Ult aqparat" Baq.kz agenttigine silteme jasap.
Atalǵan zań jobasyn halyq qalaýlylaryna QR Qarjy ministri Baqyt Sultanov tanystyrdy.
«Grýziia Úkimetiniń Qazaqstan Úkimetiniń aldyndaǵy boryshy 27 mln 774 myń AQSh dollaryn quraidy. Ol 1992-1993 jyldary eki eldiń ulttyq bankteri arasynda ózara esep aiyrysý nátijesinde paida boldy, ári memlekettik nesie retinde qaita rásimdeldi. Qaitadan qaita qurylymdaý týraly kelisimge sáikes, Grýzin tarapy Qazaqstan aldyndaǵy bereshegin tiisti sharttar boiynsha óteidi», - dedi ol.
Ministrdiń aiýtynsha, paiyzdyq mólsherleme jyldyq 4 paiyzdyq deńgeide saqtalady.
«Bereshekti óteý kestesi merzimin ótkizgeni úshin jinalǵan ósimpuldy esepke almaidy jáne Parij klýby usynystaryna sáikes uzartylady. Osylaisha, 2017 jylǵy Kelisimge sáikes 2017-2025 jyldardaǵy kezeńge Grýziia tarapynyń tólemder somasy 37 mln 997 myń 815 AQSh dollaryn quraidy», - dedi Baqyt Sultanov.
Sonymen qatar depýtattar ministrden atalǵan zań jobasynda Grýziianyń bereshegi nege 8 jylǵa deiin uzartylǵanyn túsindirýdi surady.
«Árine, bul bereshek burynda tólenetin edi. Biraq Grýziianyń ekonomikasynda biraz qiynshylyqtar bolǵannan keiin, olardyń tarapynan osyndai usynystar keldi. Parij klýbynyń usynystarynyń negizinde atalǵan máseleler qaraldy. Barlyq qaryz alýshylar óziniń bereshegin tóleý kezinde jeńildikter berýdi suraidy. Sol jeńildiktiń biri kelisim shartqa sáikes, qaryzdy qaitarý merzimin 8 jylǵa uzartý qarastyrylǵan. Biraq 8 jyldyń ishinde qaryzdyń naqty somasy kórsetilgen. Bereshek osy ýaqyt aralyǵynda tólenedi», - dedi ol.
Talqylaýlardan keiin depýtattary atalǵan zań jobasyn maquldady.
