Mońǵoliia astanasy Ulan-Bator qalasynda grek-rim kúresinen Aziia chempionaty aiaqtaldy. Qurlyq birinshiligine Qazaqstan sapynan 10 sportshy qatysyp, onyń 9-y jeńis tuǵyrynan kórindi. Atap aitqanda, grek-rim kúresiniń sheberleri 2 altyn, 5 kúmis jáne 2 qola medalǵa qol jetkizdi. Sondai-aq, grek-rim kúresinen Qazaqstan quramasy upai sany boiynsha jalpykomandalyq esepte Aziia chempionatynda kósh bastady. Eki kúnge sozylǵan jarys qorytyndysy boiynsha "klassikter" barlyǵy 180 upaiǵa ie bolǵan. Iran quramasy ekinshi bolsa, Qyrǵyzstan balýandary úzdik úshtikti túiindedi, dep habarlaidy Olympic.kz saity.
Alǵashqy altyn
Qazaqstan qorjynyna alǵashqy altyndy 130 kelide beldesken Álimhan Syzdyqov saldy. Ol finalda Ońtústik Koreia sportshysy Kim Minsokty taza jeńispen utty.
Jarysqa shirek finalda qosylǵan ol Roman Kimdi, jartylai finalda japoniialyq Arato Sonadadan ailasyn asyrǵan bolatyn.
Sensatsiiaǵa balanǵan jeńis
Jarystyń ekinshi kúninde Meiirjan Shermahanbet ádemi kúres kórsetip, 67 keli salmaq dárejesinde qarsylas shaq keltirmedi. Finalda eki dúrkin álem chempiony, eki dúrkin Aziia oiyndarynyń chempiony, eki dúrkin Aziia chempiony Riý Han Sýdy (Ońtústik Koreia) kilemge eki ret alyp uryp, ýaqytynan buryn 11:3 esebimen jeńiske jetti.
Bes balýanda - bes kúmis
Jeńil salmaqta synǵa túsken Amanǵali Bekbolatov finalda japoniialyq Iu Shiotanimen beldesti. Ekeýara kezdesý 13:2 esebimen japoniialyq balýannyń enshisine sheshildi.
Ulan-Bator bozkileminde Mirambek Ainaǵulov Aziia chempionatynyń eki dúrkin kúmis júldegeri atandy. 63 keliniń altynyn sarapqa salǵan otandasymyzdy sheshýshi beldesýde Tynar Sharshenbekov toqtatty.
77 kelide Maqsat Erejepov qyrǵyzstannyń ataqty balýany, Olimpiada oiyndarynyń kúmis júldegeri Aqjol Mahmudovpen beldesti. Aqtyq kezeńde qazaqstandyq sportshy 3:1 esebimen qarsylasynan jeńilip qalyp, qurama qorjynyna úshinshi kúmisti ákeldi.
Kúmis sany jarystyń ekinshi kúni de tolyqty. 72 kelide Abylaihan Ámzeev Mohammad Reza Hodjatolla Mahtorige ese jiberse, 82 kelide Dias Qalen Iran sportshysy Rasýl Sade Garmsirige qarsy tura almady.
Qorjynda qos qola
Qazaqstan sapyndaǵy tájiribeli balýandardyń biri Nursultan Tursynov ta júldeden tys qalmady. Ol 87 kelide ol jubanysh beldesýinde qyrǵyzstandyq Melis Aitbekovty 7:2 esebimen utyp, qola júldege ie boldy. Al 60 kelide Ernur Fidahmetov mońǵoliialyq Baljinniam Tseveenravdandy utyp, qolany qanaǵat tutty.
Osylaisha, bas bapker Serik Jumashev baptaǵan grek-rim kúresinen ulttyq qurama ulandary Aziia chempionatyn toǵyz 9 medalmen Aziia chempionatyn aiaqtady. Ulan-Bator bozkileminde 21-22 sáýir kúnderi burymdy balýandar ózara myqtyny anyqtaityn bolady.
