QR Qarjy vitse-ministri Tatiana Saveleva naqtylanǵan respýblikalyq biýdjet boiynsha jastardy qoldaý úshin qarajat qandai baǵytta jumsalatynyn atady, dep habarlaidy QazAqparat tilshisi.
«Naqtylanǵan biýdjet jobasyna Jastar jylyna bailanysty tolyqtyrýlar engizildi. Atalmysh baǵytta, iaǵni jastardy qoldaý úshin respýblikalyq biýdjetten qosymsha 24,6 mlrd teńge bólý qarastyrylǵan», - Tatiana Saveleva Parlament Májilisiniń QR-nyń 2019-2023 jyldarǵa arnalǵan áleýmettik-ekonomikalyq damý boljamyn naqtylaýǵa arnalǵan otyrysy barysynda.
Onyń aitýyna qaraǵanda, jalpy 10,7 mlrd teńgeni quraityn «Jas kásipker» baǵdarlamasyn júzege asyrý kózdelgen. Iaǵni, bul baǵytta «Bastaý biznes» jobasy boiynsha jastardy oqytý oryndarynyń sany 15 myńǵa kóbeimek. Ol kýrstarda jastarǵa biznes-jospar qurý sekildi mańyzdy taqyryptar úiretiledi.
«Aldaǵy ýaqytta 18-29 jas aralyǵyndaǵy 200 adamǵa 3 million teńgelik grant bólý josparlanyp otyr. Bul úshin «Biznestiń jol kartasy» baǵdarlamasy sheńberinde 600 mln teńge shyǵyndaý kerek bolady. Granttar innovatsiialyq, IT jáne qajettiligi joǵary biznes-jobalarǵa bólinedi. Bul baǵyttaǵy jumys kásipkerlik turǵyda joǵary áleýeti bar jastardy qoldaýǵa sep bolady», - deidi Qarjy ministriniń orynbasary.
Sonymen birge, «Eńbek» jappai kásipkerlik pen tiimdi jumyspen qamtý memlekettik baǵdarlamasy sheńberinde biznes-ideialar boiynsha 9 myń memlekettik grant bólinedi.
«Granttar «Biznes-bastaý» jobasy boiynsha kásipkerlik negizderi kýrsynan ótken jastarǵa beriledi. Sonymen qatar, «Jas maman» jobasy sheńberinde biyl 8 mlrd teńgege 180 kolledj, jańǵyrtylady. Ol qarajattyń 7,3 mlrd teńgesi materialdyq-tehnikalyq bazany qajettilikpen qamtamasyz etýge jumsalady. Búgingi kúni QR Bilim jáne ǵylym ministrligi kolledjerdi tiisti qurylǵylarmen qamtamasyz etý suraqtaryn pysyqtaýda», - deidi ol.
Sonymen qatar, sheteldik mamandardy tartýǵa 720 mln teńge jumsalady. Vitse-ministrdiń aitýynsha, bul jumys kolledj qyzmetkerlerin jabdyqpen jumys isteýge jáne satyp alynǵan jabdyqtarǵa qatysty bilim berý baǵdarlamalaryn qaita baǵyttaýǵa múmkindik beredi.
«Sonymen birge, biyl mektepte, balabaqshalarda, arnaiy mektepterde, jastardy qoldaý ortalyqtarynda, qarttar úiinde qoǵamdyq paidaly jumystarmen ainalysatyn 10 myń stýdenttiń shákirtaqysyn 30 paiyzǵa nemese 6 285 teńgege ósirý úshin 250 mln teńge baǵyttalady», - deidi vitse-ministr.
