2026 jylǵy 13 men 20 shilde aralyǵynda talapkerlerden granttar konkýrsyna qatysý úshin ótinishter qabyldanady. Qujattardy joǵary oqý oryndaryndaǵy qabyldaý ortalyqtary arqyly oflain (virtýaldy qabyldaý komissiialary arqyly onlain) nemese eGov arqyly onlain tapsyrýǵa bolady, dep habarlaidy ult.kz.
Grant konkýrsyna qatysý úshin talapkerler jeke kýálik, UBT sertifikatyn, 3h4 kólemindegi foto, orta bilim týraly attestat (tehnikalyq jáne kásiptik bilim berý uiymdarynyń túlekteri úshin diplom) tapsyrý kerek. Sondai-aq bar bolǵan jaǵdaida jeńildetilgen sanat boiynsha konkýrsqa qatysý úshin rastaityn qujattar usynylady.
Bilim berý granttary konkýrsyna qatysý jáne aqyly negizde oqýǵa túsý úshin UBT nátijeleri boiynsha kelesi shekti balldar belgilengen:
- «Pedagogikalyq ǵylymdar» jáne «Quqyq» baǵyttary boiynsha – keminde 75 ball;
- «Densaýlyq saqtaý» baǵyty boiynsha – keminde 70 ball;
- «Aýyl sharýashylyǵy jáne bioresýrstar» men «Veterinariia» baǵyttary boiynsha – keminde 50 ball;
- ulttyq joǵary oqý oryndaryna túsý úshin – keminde 65 ball;
- basqa joǵary oqý oryndaryna túsý úshin – keminde 50 ball.
Esterińizge sala ketsek, joǵary oqý oryndary bilim berý granttaryn taǵaiyndaý konkýrsyna qatysý jáne aqyly negizde oqýǵa qabyldaý úshin óz shekti balldaryn ózderi belgileýge quqyly.
Aýyldyq jerlerden shyqqan jáne áleýmettik osal toptarǵa jatatyn talapkerlerdi qoldaý maqsatynda qabyldaý naýqany aiasynda arnaiy sharalar qarastyrylǵan. Atap aitqanda, granttar konkýrsyna qatysý barysynda memleket bekitken kvotalar bar.
Aita keteiik, 2026 jyly «Tsifrlyq ýniversitet» qaǵidatyn júzege asyrý jalǵasady: úderisterdiń basym bóligi avtomattandyrylǵan, bul konkýrstyq irikteýdiń ashyqtyǵyn arttyrady.
Bilim berý granty iegerleriniń tizimi 10 tamyzǵa deiin jariialanady.
