Google keńsesine koronovirýsqa qarsy vaktsina alǵan qyzmetkerler ǵana kele alady, - dep habarlaidy Tengrinews.kz tilshisi Google jazbasyna silteme jasap.
Kompaniia koronavirýstyń jańa tolqyny órshýine bailanysty qyzmetkerlerdiń qashyqtan jumys isteý rejimin alyp tastaýdy 1 qyrkúiekten 18 qazanǵa aýystyrdy.
Google bas direktory Sýndar Pichaidyń aitýynsha, Google kampýstaryna jumysqa oralǵysy keletin qyzmetkerler vaktsina alýy kerek. Jeńildik tek densaýlyǵyna bailanysty vaktsina almaityn adamdar úshin jasalady.
"Kampýstarǵa jumysqa keletinderdiń bárine vaktsina alý mindetteledi. Biz bul saiasatty AQSh-ta aldaǵy aptalarda, al basqa aimaqtarda aldaǵy ailarda júzege asyramyz. Iske asyrý jergilikti jaǵdailar men erejelerge sai ózgeredi", - delingen Pichai málimdemesinde.
Sonymen qatar, qyzmetkerlerge 18 qazanǵa deiin qashyqtan jumys isteýge ruqsat etildi, óitkeni kóp adam "delta" shtamyna bailanysty jergilikti aýrýdyń órshýine alańdaidy jáne keńsede jumys isteýge qorqady. Odan keiin kompaniia qyzmetkerleri keńsede aptasyna keminde úsh kún jumys isteýi kerek.
Alaida, erekshe jaǵdaiǵa tap bolǵan adamdar 2021 jyldyń sońyna deiin qashyqtan jumys istei alady.
