Amerikalyq Google korporatsiiasy men Facebook Ireland Ltd. kompaniiasy Tájikstanda elektrondy qyzmet kórsetetin salyq tóleýshi retinde tirkeýge turdy. Álemdik dárejedegi media alpaýyttar Tájikstan úkimetine qarasty arnaiy sait kómegimen tirkelgen.
Tájikstan Salyq kodeksine engizilgen "Google salyǵy" degen jańa ózgeris 16 qańtarda kúshine endi. Ol boiynsha, sheteldik kompaniialar kórsetken elektrondyq qyzmeti úshin Tájikstanǵa salyq tóleýge mindetti.
Azattyqtyń Tájik qyzmetiniń habarlaýynsha, Google men Facebook-tyń salyq tóleýshi retinde tirkeýge turýy eldegi qarapaiym internet qoldanýshyǵa esh áser etpeidi. Máselen, Facebook-tegi jarnama úshin aqsha tólegen tájikstandyq qoldanýshyǵa bul úshin salyq salynbaidy. Al sheteldik kompaniialar Tájikstan azamattarynan túsken tabysy úshin salyq tóleýi tiis. Olarmen qosa blogerler de salyq tóleýge mindetteledi. Al Tájikstandaǵy zańdy tulǵalarǵa, jeke kásipkerlerge ne sheteldik kompaniialardyń ókildikterine qyzmet kórsetilse, olar "salyq agentteri" dep tanylady.
Tájikstan úkimetiniń janyndaǵy bailanys qyzmetiniń basshysy Bek Sabýrov 2015 jyly Facebook-ty buǵattaý kezinde bul áleýmettik jeli iesine eldegi qyzmeti úshin salyq tóletý jaiyn talqylaý maqsatynda kompaniia basshysy, amerikalyq milliarder Mark Tsýkerbergpen kezdesýge ázir ekenin málimdegen. Ol tusta tájik sheneýniginiń bul pikiri ázil-ospaq taqyrybyna ainalǵan.
Google, YouTube, Facebook jáne basqa da áleýmettik jeliler men qyzmetterdi buǵattaityny úshin Tájikstan basshylyǵy jii synalady. Kóbine oppozitsiialyq toptardyń áreketteri men túrli qoǵamdyq-saiasi oqiǵalar kezinde elde áleýmettik jeliler ashylmai qalady.
"Tájikstan media aliansy" qaýymdastyǵynyń basshysy Ábdýmálik Qadyrovtyń aitýynsha, Google i Facebook-tyń salyq tóleýshi retinde tirkeýge turýy biliktiń olardy buǵattaý saiasatyna esh áser etpeidi. "Áleýmettik jelige shek qoiý – saiasi sheshim. Tájikstanda saiasat ekonomikaǵa ústemdik etedi. Tájikstanda bóten pikirmen kúres birinshi orynda tur. Bóten pikirge jol bermes úshin bilik kez kelgen kiristen bas tartýǵa ázir" dedi Qadyrov Azattyqqa.
