Gonkongte kóp qabatty ǵimaratta sársenbi kúni órt shyǵyp, onyń joǵarǵy bóliginde shamamen 350 adam qalyp qoiǵan, dep habarlaidy QazAqparat Dimsum Daily jańalyqtar portalyna silteme jasap.
Portaldyń habarlaýynsha, osy saǵatqa deiin 165 adam ǵimarattan evakýatsiialanǵan. Júzge jýyq adam besinshi qabattaǵy ashyq platformada, 350 adam shatyrda qalǵan.
Sońǵy derekter boiynsha, segiz adam zardap shekken.
Órt Gonkong aralyndaǵy Kozýei-bei aýdanynda ornalasqan Dúniejúzilik saýda ortalyǵynyń (World Trade Center) ǵimaratynda túski úzilis kezinde tutanǵan. Bul týraly alǵashqy habar 12:37-de túsken. Qazirgi kezde órt sóndirýshiler órtti bes deńgeidiń ishinde úshinshisine baǵalap otyr.
38 qabatty munaranyń tómengi bóliginde dúkender men meiramhanalar, al joǵary bóliginde keńseler ornalasqan. Jerasty turaǵynan besinshi qabatqa deiin jóndeý jumystaryna bailanysty jabyq bolǵan, atalǵan qabattardaǵy saýda núkteleri jumys istemegen. Kelýshiler úshin altynshy qabattan 13-qabatqa deiingi meiramhanalar, sonymen qatar 14-qabattan 38-qabatqa deiingi keńseler ashyq bolǵan.
Órt birinshi qabattaǵy tehnikalyq bólmede tutanǵan bolýy múmkin, ol jerden jalyn qurylys aǵashtaryna qarai ótken.
