گونكونگتە كٶپ قاباتتى عيماراتتا سەرسەنبٸ كٷنٸ ٶرت شىعىپ, ونىڭ جوعارعى بٶلٸگٸندە شامامەن 350 ادام قالىپ قويعان, دەپ حابارلايدى قازاقپارات Dimsum Daily جاڭالىقتار پورتالىنا سٸلتەمە جاساپ.
پورتالدىڭ حابارلاۋىنشا, وسى ساعاتقا دەيٸن 165 ادام عيماراتتان ەۆاكۋاتسييالانعان. جٷزگە جۋىق ادام بەسٸنشٸ قاباتتاعى اشىق پلاتفورمادا, 350 ادام شاتىردا قالعان.
سوڭعى دەرەكتەر بويىنشا, سەگٸز ادام زارداپ شەككەن.
ٶرت گونكونگ ارالىنداعى كوزۋەي-بەي اۋدانىندا ورنالاسقان دٷنيەجٷزٸلٸك ساۋدا ورتالىعىنىڭ (World Trade Center) عيماراتىندا تٷسكٸ ٷزٸلٸس كەزٸندە تۇتانعان. بۇل تۋرالى العاشقى حابار 12:37-دە تٷسكەن. قازٸرگٸ كەزدە ٶرت سٶندٸرۋشٸلەر ٶرتتٸ بەس دەڭگەيدٸڭ ٸشٸندە ٷشٸنشٸسٸنە باعالاپ وتىر.
38 قاباتتى مۇنارانىڭ تٶمەنگٸ بٶلٸگٸندە دٷكەندەر مەن مەيرامحانالار, ال جوعارى بٶلٸگٸندە كەڭسەلەر ورنالاسقان. جەراستى تۇراعىنان بەسٸنشٸ قاباتقا دەيٸن جٶندەۋ جۇمىستارىنا بايلانىستى جابىق بولعان, اتالعان قاباتتارداعى ساۋدا نٷكتەلەرٸ جۇمىس ٸستەمەگەن. كەلۋشٸلەر ٷشٸن التىنشى قاباتتان 13-قاباتقا دەيٸنگٸ مەيرامحانالار, سونىمەن قاتار 14-قاباتتان 38-قاباتقا دەيٸنگٸ كەڭسەلەر اشىق بولعان.
ٶرت بٸرٸنشٸ قاباتتاعى تەحنيكالىق بٶلمەدە تۇتانعان بولۋى مٷمكٸن, ول جەردەن جالىن قۇرىلىس اعاشتارىنا قاراي ٶتكەن.
