Qazaqstandyq boksshy Gennadii Golovkin (38-1-1, 34 KO) Los-Andjeleste jańa áriptesi DAZN strimingilik servisimen birlesken baspasóz máslihatyn ótkizdi, dep habarlaidy QazAqparat tilshisi.
Baspasóz máslihatynyń tolyq nusqasy Youtube videohostingindegi DAZN USA arnasynda jariialandy.
«Erkin agent bolǵandyqtan meniń egjei-tegjeili oilanýǵa ýaqytym boldy. DAZN meniń ideialarymdy iske asyratyn, bokstyń jańa deńgeiine shyǵaratyn múmkindik ári bolashaqta barlyq boksshynyń úii bolady dep oilaimyn», - dedi Golovkin.
Boksshy DAZN-men jasaǵan kelisimshart boiynsha 6 kezdesýdiń barlyǵyn oidaǵydai ótkize alatynyn aitty.
«Men ózimdi jaqsy sezinemin. Osy alty jekpe-jekten keiin taǵy oilanyp kóremiz. Bul ázirge bizdiń alǵashqy qadamymyz», - dedi ol.
Golovkin baspasóz máslihaty kezinde aldaǵy maqsaty - úzdik boksshy ataný ekenin atap kórsetti.
«Beldikterdi biriktirý ainalasynda kóp saiasat bar ekenin qazir kópshilik túsinedi. Búkil beldiktiń iesi bola otyryp, úzdik boksshy atanbaǵan boksshylar da bar. Maqsat - jai ǵana beldiktiń iesi bolý emes, álemde úzdik bolý», - dedi GGG.
Gennadii sondai-aq «Kanelomen» úshinshi aiqasqa qatysty pikir bildirdi.
«Árine, ótken kezdesýlerden biz úlken tájiribe jinaqtadyq. Úshinshi jekpe-jek qyzyqqa ári básekege toly bolýy úshin qoldan kelgenniń bárin jasaimyz», - dedi Golovkin.
«Bul men úshin mańyzdy pýnkt boldy. Biraq qazir eń úlken, eń qyzyqty jekpe-jekterdi ótkizgimiz keledi. Biz boks áleminiń shyńynda bolýdy qalaimyz», - dep qosty ol.
Budan bólek, qazaqstandyq boksshy basqa salmaq sanatyna aýysý múmkindigin de joqqa shyǵarmady.
«Ózderińiz bilesizder, men DAZN-ǵa úzdik boksshylarmen judyryq túiistirý úshin kelgenmin. Eger basqa salmaq sanatynda qyzyqty jekpe-jek ótkizý múmkindigi bolsa, sol salmaqqa aýysamyn», - dedi.
