Qazaqstandyq kásipqoi boksshy, Olimpiada chempiony Daniiar Eleýsinov «GGG-Rolls» jekpe-jeginiń anderkartynda ringke shyqpai qalýyna qatysty pikir bildirdi, dep habarlaidy QazAqparat tilshisi.
Boksshynyń pikiri «Qazaqstan kásipqoi boks federatsiiasynyń» VKontakte paraqshasynda jariialanǵan.
«Sońyna deiin 8 maýsymda judyryqtasamyn dep oiladym. Qazaqstandyq jankúierler úshin bul - óte jaqsy jańalyq, naǵyz mereke bolar edi. Bári de bir boks keshinde birneshe otandasymyzdy kórgisi kelgen bolatyn. Biraq aiaq astynan men aiqasatyn ýaqyt odan erterek qoiylyp ketti. Osyǵan bailanysty tezirek salmaq qýyp, qarsylasty aýystyrýǵa týra keldi. 8 maýsymda menimen shyǵýy tiis boksshy 25 mamyrda jekpe-jekke shyǵa almaidy. Sondyqtan qysqa merzim ishinde jańasyn izdeýge týra keledi. Sparringterdi de burynyraq bastaýǵa májbúr boldyq», - deidi Eleýsinov.
Degenmen, boksshy barlyq jaǵdaiǵa sabyrmen, salqynqandy qaraitynyn jetkizdi.⠀
«Bolyp jatqan jaǵdaidyń bárin jaqsylyqqa jorimyn. Men jeńiske jetemin. Árine, belgilengen merzimnen eki apta buryn shyǵý - jaǵymsyz-aq. Keibireýler meni GGG arqyly ataǵyn aspandatqysy keledi dep júrgen bolar. Shyn máninde bul maǵan qajet emes. Bul - naqty jaǵdai. Meniń óz aýditoriiam, jankúierlerim, halqym bar. Maǵan mundai piardyń keregi joq. Jaǵymsyz eshteńe aitqym kelmeidi. Bireýdi qaralaý oiymda bolǵan emes. Meniń oiymsha, Gennadii bul isimen ózine jaqsylyq jasap otyrǵan joq. Oǵan sáttilik pen jeńis tileimin, sebebi ol - meniń otandasym. Meniń túsinýimshe, ol kezinde BAQ-qa bergen suhbatymnan alynǵan bir-eki aýyz sózge renjip qalǵan bolýy kerek. Biraq Niý-Iorkte kezdesken kezimizde renishin maǵan tike aitsa bolar edi ǵoi. Men renjimeimin. Bári jaqsy. 25 mamyrdaǵy aiqasqa daiyndalamyn», - deidi Daniiar Eleýsinov.
Eske sala ketsek, taiaýda Daniiar Eleýsinovtiń Golovkinniń jekpe-jeginde óner kórsetpeitini belgili bolǵan edi. Boksshynyń menedjeri Ziia Aliev Sports.kz-ke bergen suhbatynda Eleýsinovtiń 8 maýsymdaǵy Golovkin-Rolls anderkartyndaǵy jekpe-jegi belgisiz sebepterge bailanysty bolmaitynyn jetkizgen.
Keiin bul máselege qatysty QR Kásipqoi boks federatsiiasynyń vitse-prezidenti Viktor Demianenko pikir bildirip, Golovkin men Eleýsinov arasynda qandai da bir túsinbeýshilik bar degenge senbeitinin aitqan bolatyn.
