قازاقستاندىق كەسٸپقوي بوكسشى, وليمپيادا چەمپيونى دانييار ەلەۋسٸنوۆ «GGG-روللس» جەكپە-جەگٸنٸڭ اندەركارتىندا رينگكە شىقپاي قالۋىنا قاتىستى پٸكٸر بٸلدٸردٸ, دەپ حابارلايدى قازاقپارات تٸلشٸسٸ.
بوكسشىنىڭ پٸكٸرٸ «قازاقستان كەسٸپقوي بوكس فەدەراتسيياسىنىڭ» ۆكونتاكتە پاراقشاسىندا جارييالانعان.
«سوڭىنا دەيٸن 8 ماۋسىمدا جۇدىرىقتاسامىن دەپ ويلادىم. قازاقستاندىق جانكٷيەرلەر ٷشٸن بۇل - ٶتە جاقسى جاڭالىق, ناعىز مەرەكە بولار ەدٸ. بەرٸ دە بٸر بوكس كەشٸندە بٸرنەشە وتانداسىمىزدى كٶرگٸسٸ كەلگەن بولاتىن. بٸراق اياق استىنان مەن ايقاساتىن ۋاقىت ودان ەرتەرەك قويىلىپ كەتتٸ. وسىعان بايلانىستى تەزٸرەك سالماق قۋىپ, قارسىلاستى اۋىستىرۋعا تۋرا كەلدٸ. 8 ماۋسىمدا مەنٸمەن شىعۋى تيٸس بوكسشى 25 مامىردا جەكپە-جەككە شىعا المايدى. سوندىقتان قىسقا مەرزٸم ٸشٸندە جاڭاسىن ٸزدەۋگە تۋرا كەلەدٸ. سپاررينگتەردٸ دە بۇرىنىراق باستاۋعا مەجبٷر بولدىق», - دەيدٸ ەلەۋسٸنوۆ.
دەگەنمەن, بوكسشى بارلىق جاعدايعا سابىرمەن, سالقىنقاندى قارايتىنىن جەتكٸزدٸ.⠀
«بولىپ جاتقان جاعدايدىڭ بەرٸن جاقسىلىققا جوريمىن. مەن جەڭٸسكە جەتەمٸن. ەرينە, بەلگٸلەنگەن مەرزٸمنەن ەكٸ اپتا بۇرىن شىعۋ - جاعىمسىز-اق. كەيبٸرەۋلەر مەنٸ GGG ارقىلى اتاعىن اسپانداتقىسى كەلەدٸ دەپ جٷرگەن بولار. شىن مەنٸندە بۇل ماعان قاجەت ەمەس. بۇل - ناقتى جاعداي. مەنٸڭ ٶز اۋديتورييام, جانكٷيەرلەرٸم, حالقىم بار. ماعان مۇنداي پياردىڭ كەرەگٸ جوق. جاعىمسىز ەشتەڭە ايتقىم كەلمەيدٸ. بٸرەۋدٸ قارالاۋ ويىمدا بولعان ەمەس. مەنٸڭ ويىمشا, گەنناديي بۇل ٸسٸمەن ٶزٸنە جاقسىلىق جاساپ وتىرعان جوق. وعان سەتتٸلٸك پەن جەڭٸس تٸلەيمٸن, سەبەبٸ ول - مەنٸڭ وتانداسىم. مەنٸڭ تٷسٸنۋٸمشە, ول كەزٸندە باق-قا بەرگەن سۇحباتىمنان الىنعان بٸر-ەكٸ اۋىز سٶزگە رەنجٸپ قالعان بولۋى كەرەك. بٸراق نيۋ-يوركتە كەزدەسكەن كەزٸمٸزدە رەنٸشٸن ماعان تٸكە ايتسا بولار ەدٸ عوي. مەن رەنجٸمەيمٸن. بەرٸ جاقسى. 25 مامىرداعى ايقاسقا دايىندالامىن», - دەيدٸ دانييار ەلەۋسٸنوۆ.
ەسكە سالا كەتسەك, تاياۋدا دانييار ەلەۋسٸنوۆتٸڭ گولوۆكيننٸڭ جەكپە-جەگٸندە ٶنەر كٶرسەتپەيتٸنٸ بەلگٸلٸ بولعان ەدٸ. بوكسشىنىڭ مەنەدجەرٸ زييا اليەۆ Sports.kz-كە بەرگەن سۇحباتىندا ەلەۋسٸنوۆتٸڭ 8 ماۋسىمداعى گولوۆكين-روللس اندەركارتىنداعى جەكپە-جەگٸ بەلگٸسٸز سەبەپتەرگە بايلانىستى بولمايتىنىن جەتكٸزگەن.
كەيٸن بۇل مەسەلەگە قاتىستى قر كەسٸپقوي بوكس فەدەراتسيياسىنىڭ ۆيتسە-پرەزيدەنتٸ ۆيكتور دەميانەنكو پٸكٸر بٸلدٸرٸپ, گولوۆكين مەن ەلەۋسٸنوۆ اراسىندا قانداي دا بٸر تٷسٸنبەۋشٸلٸك بار دەگەنگە سەنبەيتٸنٸن ايتقان بولاتىن.
