WBA, WBC men IBO boiynsha álem chempiony Gennadii Golovkin aldaǵy josparlarymen bólisti, dep habarlaidy QazAqparat tilshisi.
«Men aldymen Qazaqstanǵa baryp kelemin. Sosyn kelesi aptada daiyndyqqa kirisetin shyǵarmyn. Úige barǵym kelip júr. Dostarymdy, týǵan-týystarymdy kórgim keledi. Qazir mende bos ýaqyt bar. Al kelesi aptadan bastap tolyǵymen boksqa berilýim kerek», - dedi G.Golovkin Yahoo! Sports saityna bergen suhbatynda.
Budan bólek, GGG aldaǵy jekpe-jekke qatysty óz oiyn bildirdi. Saýl Alvareske qarsy basqa strategiiany qoldanatynyn da jetkizdi. «Ol maǵan shabýyl jasasa, tipti jaqsy. Jankúierlerge ondai boks unaidy. Sosyn meniń aldaǵy jekpe-jekke qatysty kózqarasym ózgerdi. Qazir men ol aiqasqa basqasha qaraimyn, emotsiiam da ózgeshe. Strategiiam da ózgerdi», - dep atap kórsetti G.Golovkin.
Aita keteiik, Gennadii Golovkin men Saýl Alvares arasyndaǵy ekinshi jekpe-jek 15 qyrkúiekte AQSh-tyń Las-Vegas shtatynda ótedi. Boks keshi ótetin jer - «T-Mobile Arena». Birinshi jekpe-jek te atalǵan sport kesheninde uiymdastyrǵan bolatyn. Eki boksshy biraz pikirtalastan keiin gonorardy 57,5/42,5 etip, ózara bólisýge kelisti. Aqshanyń basym bóligin «Kanelo» alyp ketedi. Degenmen, keibir sarapshylar Golovkin 45 protsentti «julyp aldy» dep otyr. Sebebi GGG 42,5-ten birden bas tartqan bolatyn. Alaida bir saǵattyń ishinde tiimdi usynys túskennen keiin kelisimshartty rásimdeýge kelisti. Alaida eki jaq atalǵan qujatta kórsetilgen protsentterdi jariialamaýǵa ýaǵdalasty. Sonyń saldarynan sport sarapshylary «tiimdi usynystyń» sharttaryn bile almai otyr.
