Sonymen, Gena jeńildi. Dál tigen soqqysynyń sany (234:202) boiynsha bizdiń jigit alda bolǵanymen, jeńis Kaneloǵa berildi. Ol túsinikti de. Óitkeni, bul jekpe-jektiń nátijesine ringtegi judyraqtasýdan bólek ózge de sheshýshi faktorlar áser etkeni sózsiz.
Olar: Gena - qanshama myqty bolyp, jankúieri kóp bolsa da, AQSh-ta kásipqoi boks álemi úshin bóten jan; Kanelo – kásipqoi bokstaǵy eń yqpaldy promoýterlik kompaniia Golden boy promotions-tiń basty juldyzy, iaǵni negizgi tabys kózi;
Kásipqoi bokstyń otany – AQSh bolsa, ondaǵy negizgi jankúier, iaǵni tabys kózi meksikalyqtar ekeni belgili. Sol sebepti de negizgi boks keshteri meksikalyqtardyń ulttyq merekeleri – 5-mamyrdaǵy Sinko de Maio jáne 16-qyrkúiektegi Meksikanyń táýelsizdik kúni meiramyna orai uiymdastyrylady. Óitkeni, mol tabys tabady. Sol sebepti de kásipqoi bokstaǵy kez-kelgen oqiǵany úlken biznespen bailanystyrady.
Al bul salanyń jazylmaǵan óz zańy men tártibi bar. Oǵan syrttan bótenderdi kóp jolata bermeidi. Tek myqtylardyń myqtysy ǵana qarsylyqtarǵa qaramastan, kedergilerdi buzyp, sol álemge jol sala alady. Gena - solardyń biri. Ol óziniń taza talantynyń, eńbekqorlyǵynyń arqasynda kásipqoi boks álemine ózin moiyndatty. Milliardtaǵan dollar qarjy ainalyp júrgen salada óziniń de «talasy» bar ekenin dáleldedi. GGG brendin qazir bul salaǵa qatysy bardyń bári biledi. Gena qazir óz talaptaryn qoia alady. Kásipqoi boks álemi onymen eseptesedi. Biraq, bul máńgilik osylai bop qala beredi degen sóz emes. Nebir myqty boksshylar jeńilip, basynan baq taiǵan soń tez umytylyp ketti. Genaǵa qatysty biz ondaiǵa jol bermeýge tiispiz.
Iá, keshegi «jeńilisten» keiin keibir keraýyzdardy eseptemegende, qazaqstandyqtardyń barlyǵy qoldaý bildirip jatyr. «Gena – biz úshin báribir chempion», «Gena – sen úzdiksiń» degen sózderdi aitpaǵan otandasymyz kemde-kem shyǵar. Erteń ol elge oralǵan soń da jankúierler qushaq jaia qarsy alyp, tórine shyǵaryp, ministr-ákimder kabinetinde jeke qabyldap, keýdesine temir-tersegin taǵatyn shyǵar. Árine, bul sportshy úshin úlken qoldaý bolary sózsiz.
Degenmen, tek moraldyq qoldaý kórsetýmen shektelip qalatyn jaǵdai emes bul. Genaǵa naqty qoldaý kerek. Ol sporttyq ǵumyry aiaqtalǵan soń da kásipqoi boks álemindegi beldi, bedeldi tulǵa bolyp qalýy tiis. Onyń «GGG promotions» kompaniiasy qazirgi Oskar de la Hoiianyń «Golden boy promotions», Bob Arýmnyń «Top Rank», Eddi Hirnniń «Matchroom sport» kompaniialary siiaqty kásipqoi boks salasynyń basty oiynshylarynyń birine ainalǵany durys. Qazir túrli promoýterlik kompaniialardyń bosaǵasynda júrgen Batyr Júkembaev, Daniiar Eleýsinov, Qanat Islam, Jan Kosobýtskii, Ivan Dychko syndy ózge de myqty jigitterdi osy «GGG promotions» kompaniiasyna jinap, solarǵa jaǵdai jasasa. Sheberlikteri eshkimnen kem emes myqty boksshylarymyz sonda qulqynynyń qamyn ǵana oilaityn ózgelerge jem bolmai, erteń-aq álem chempiony bolar edi. Jáne bolashaqta da talai talanattardyń tanylýyna jol ashylar edi. Bul jumys júieli túrde júrgizilse, álemdik kásipqoi boksta bizdiń jigitter eleýli kúshge ainalar edi. Jeńip turǵan jekpe-jekterinde jyǵyp berip, tapa-tal túste tonaý bolmas edi.
Biraq, oǵan Genanyń bir óziniń shamasy jetpesi anyq. Oǵan eń bastysy qomaqty qarjy kerek. Bizdiń iri kásipkerler men kompaniialar basynda qarjylai qoldaý kórsetip jiberse, aiaǵynan nyq turyp alǵan soń ózderi-aq sharýasyn dóńgelete berer edi. «Samuryq Qazyna» qory sporttyq nátijesi de tómen, imidjdik áseri de shamaly jobalarǵa jumsap jatqan qarajatynyń bir bóligin osyǵan baǵyttasa tek utar edik. Óitkeni, GGG brendi Qazaqstanmen tikelei bailanysty. Gena arqyly kásipqoi boks álemi Qazaqstandy tanydy jáne moiyndady. Ataqty promoýterlerdiń qazaq boksshylaryna qyzyǵýshylyq tanyta bastaýy da - Golovkinniń arqasy. Elimizdiń halyqaralyq imidjin jaqsartýda ol qanshama qarjy jumsalǵan baǵdarlamalar men jobalardan da artyq qyzmet etti.
Endeshe, «GGG promotions» kompaniiasyna el bolyp qoldaý kórsetý Genadii Golovkinniń eren eńbegine kórsetilgen qurmet qana emes, Qazaqstandy sporttyq derjava retinde tanyta túsýge, álemdik bedelin arttyrýǵa jasalǵan naqty qadam bolmaq.
Daniiar Meńlibekovtiń feisbýktegi jazbasynan
