Foto: Akorda.kz
Memleket basshysy Qasym-Jomart Toqaev pen Ázerbaijan Prezidenti Ilham Áliev Astananyń ortalyǵyndaǵy Geidar Áliev atyndaǵy kósheni saltanatty túrde ashty, dep habarlaidy "Ult aqparat" Aqordanyń resmi saityna silteme jasap.
Memleket basshysy byltyr Ázerbaijanǵa resmi sapary barysynda Ilham Álievpen mádeni-gýmanitarlyq yntymaqtastyqty nyǵaitý jóninde kelisimge kelgenin eske salyp, bul, eń aldymen, eki eldiń dostyq qarym-qatynasyn bekemdei túsý úshin óte mańyzdy qadam ekenin aitty.
– Geidar Áliev sekildi álemdik deńgeidegi tulǵanyń atyn ulyqtaý – bizdiń paryzymyz. Astanada onyń esimimen atalǵan jańa kósheniń ashylýy – bizdiń osy igi iske qosqan mańyzdy úlesimiz. Ázerbaijan halqynyń uly perzentine degen zor iltipatymyz ári shynaiy qurmetimiz, – dedi Qasym-Jomart Toqaev.
Prezident óz sózinde Geidar Álievtiń kúrdeli kezeńde el biligin qolǵa alyp, Ázerbaijannyń memlekettiligin nyǵaitýda zor ról atqarǵanyn atap ótti.
– «Geidar» esimi «aldyńǵy shepte júrýshi» degen maǵyna beredi. Munyń simvoldyq máni bar. Ony qazirgi qarqyndy damý jolyna túsken Ázerbaijannyń arhitektory desek, artyq aitqandyq emes. Onyń saliqaly basshylyǵymen Ázerbaijanda eleýli saiasi jáne áleýmettik-ekonomikalyq ózgerister jasaldy. El qiyn kezeńderdi eńserip, damýdyń dańǵyl jolyna tústi. Álemdik qoǵamdastyqtyń bedeldi múshesi boldy. Shyn máninde, Geidar Áliev esimi Ázerbaijannyń naǵyz brendine ainaldy. Onyń ómir joly – ultqa adal qyzmet etýdiń jarqyn úlgisi, – dedi Memleket basshysy.
Budan bólek, Qasym-Jomart Toqaev Geidar Álievtiń Qazaqstan men Ázerbaijan arasyndaǵy ekijaqty qarym-qatynasty nyǵaitýǵa ólsheýsiz úles qosqanyna toqtaldy. Sondai-aq onyń qazaqtar týraly jyly pikir bildirip qana qoimai, túp-tamyrymyz ben tarihi muramyz ortaq ekenin únemi aityp otyratynyn eske aldy.
Sonymen qatar Memleket basshysy búgingi Qazaqstan men Ázerbaijan arasyndaǵy qarym-qatynas berik ári úilesimdi, strategiialyq seriktestik pen odaqtastyq rýhynda damyp kele jatqanyna nazar aýdardy.
Óz kezeginde Ázerbaijan Prezidenti Ilham Áliev bizdiń elimizge resmi sapary aiasynda osyndai keremet tarihi sátke kýá bolyp otyrǵanyna qýanyshty ekenin jetkizip, Geidar Álievtiń táýelsiz Ázerbaijan memleketiniń qalyptasýyndaǵy tarihi róline toqtaldy.
– Qasym-Jomart Kemeluly Geidar Álievtiń baýyrlas qazaq halqyna degen yqalasy men súiispenshiligi erekshe bolǵanyn aitty. Rasynda, solai. Men buǵan kýámin. Ol qazaqtardyń salt-dástúrin, mádenietin jaqsy biletin jáne kóp ǵasyrlyq tarihyna qurmetpen qaraityn. Ol qazaqtar men ázerbaijan halqynyń baýyrlastyǵyn joǵary baǵalady. Sondai-aq ol túrki álemin odan ári biriktirý úshin qolynan kelgenniń bárin jasady. Biz búgin túrki áleminiń birigip, halyqaralyq arenada bedeldi jáne ie qýatty uiym qurǵanyna kýá bolyp otyrmyz. Bul – Geidar Álievtiń de eńbeginiń jemisi, – dedi Ázerbaijan Prezident.
Sonymen qatar Ilham Áliev Qazaqstan Prezidenti men halqyn áleýmettik-ekonomikalyq damý jetistikterimen quttyqtap, elimizdiń halyqaralyq arenadaǵy bedeli zor ekenin atap ótti.
Saltanatty rásimnen keiin Qasym-Jomart Toqaevtyń qatysýymen Ázerbaijan Prezidenti Ilham Áliev Astana qalasyndaǵy Botanikalyq baqta aǵash otyrǵyzdy.
