Almatyda kórnekti jazýshy, aýdarmashy, pýblitsist Gerold Belgerdiń atyna kóshe ataýy berildi. Shahardyń Naýryzbai aýdanynda oryn tepken kósheniń jalpy uzyndyǵy bir jarym shaqyrymǵa sozylyp jatyr. Munda jazýshynyń jarqyn beinesin jańǵyrtqan taqtaisha da ilingen.
Qalamgerdiń rýhyn aspandatqan aitýly sharaǵa Reseiden týǵan-týystary men jubaiy arnaiy keldi. Jinalǵandar jyly estelikterimen bólisip, qabyrǵaly qalamgerdiń azamattyq tulǵasyn tebirene eske aldy. Ásirese, ákesiniń atyna kóshe buiyrǵany qyzy Irina Belgerdi airyqsha qýantypty. Sebebi, qazir ol Gerold Belgerdiń qoljazbalaryn, jeke zattaryn jinastyryp, murajaiǵa ótkizýdi qolǵa alǵan. «Ákemizdiń ómirden ozǵanyna bes jylǵa jýyqtady. Qazir qolymyzdan kelgenshe onyń esimin urpaq sanasynda áldileý úshin estelikter jinastyrý ústindemiz. Qolymyzda kóptegen qoljazbalary bar. Olardy retke keltirýdi kózdep otyrmyz. Ákem ulty nemis bolsa da qazaq halqyn erekshe súidi, sońǵy demi qalǵansha ádebieti men rýhaniiatyna qaltqysyz qyzmet qyldy», – deidi Irina Belger.
Jazýshynyń qyzy tilge tiek etkendei, sanaly ǵumyrynyń sáýleli sátterin ádebiet álemine baǵyshtaǵan Belgerdiń qazaq halqyna degen mahabbaty shyǵarmalary arqyly kóptep kórinis tabady. Oǵan jazýshynyń «Abai i Gete» zertteý eńbegindegi: «Meniń Abaidy tanýym Geteni túsinýden bastalýǵa tiis syqyldy edi. Qanshama qazaqsha oqyp, qazaq aýylynda óstim degenmen, nemis emespin be? Biraq bári kerisinshe bolyp shyqty. Men áýeli Abai arqyly Geteni taptym. Bul ánsheiin aityla salǵan jyltyraq sóz emes. Basqasyn bylai qoiǵanda, Geteniń áigili «Jolaýshynyń túngi jyry» atty óleńin men áýeli Abaidyń «Qarańǵy túnde taý qalǵyp» degen óleńin oqyp baryp, Lermontovtyń «Taý shyńdary» arqyly boiyma sińirippin», degen joldary dálel.
Daryn atyndaǵy dańǵyldyń resmi ashylý saltanatyna jinalǵan ziialy qaýym ókilderi de onyń qazaqtyń qasietti saltyn óte tereń biletinin, shyǵarmalary halyqqa birtaban jaqyn ekenin aityp, Belgerdiń jazýshylyq qyry men azamattyq syry týraly tereńnen tolǵady.
Almatynyń Naýryzbai aýdanynda sońǵy eki jylda 100 kóshe jańa ataý enshilegen. Buǵan deiin elimizdiń eki birdei iri qalasynda jazýshynyń atyna kóshe ataýy berilgen bolatyn.
