Berlindegi "Sharite" klinikasynyń dárigerleri reseilik oppozitsioner Aleksei Navalnyi "ingibitor holinesteraz" tobyna jatatyn ýly zattan ýlanǵan" dep málimdedi.
Bul týraly habar 24 tamyzda klinikanyń saitynda jariialandy. Nemis dárigerleri Navalnyidyń naqty neden ýlanǵanyn habarlamady. Habarlamada "táýelsiz zerthanalarda júrgizilgen taldaýlarda Navalnyidyń aǵzasynan holinesteraz birneshe ret tabylǵany" jazylǵan.
"Diagnozǵa sai, naýqasqa antidot atropin beriledi. Derttiń qalai áser etetini belgisiz, júike júiesine uzaq ýaqyt áser etýi de múmkin" dedi klinika.
Germaniialyq dárigerlerdiń sózinshe, Navalnyi áli de jansaqtaý bóliminde es-tússiz jatyr, degenmen ómirine qaýip joq.
Resei prezidenti Vladimir Pýtinniń synshysy Navalnyi 20 tamyzda "ýlanǵan bolýy múmkin" dep Omby aýrýhanasyna túsken. Navalnyi osy kúni Tomsk qalasynan Máskeýge ushyp bara jatqanda jaǵdaiy kúrt nasharlap, ushaq Omby qalasyna qonǵan. Keiin jedel járdemmen oppozitsionerdi Ombydaǵy aýrýhanaǵa jetkizgen. Keiin Germaniia Navalnyidy Berlindegi aýrýhanaǵa áketý úshin arnaiy sanaviatsiia jibergen. Basynda Omby dárigerleri Navalnyidy ornynan qozǵaýǵa bolmaidy dep ony Germaniiaǵa jiberýden bas tartqan. Keiin ombylyq dárilerler Navalnyidy aýrýhanadan áketýge ruqsat berip, Navalnyi 22 tamyzda Berlinge jetkizilgen.
Reseilik dárigerler Navalnyidyń alǵashqy analizderinen ýly zat tabylmaǵanyn habarlaǵan edi. Biraq onyń jaqtastary saiasatkerdiń ýlanǵanyn aitqan.
Ingibitor holinesteraz – atsetilholinesteraz fermentteriniń jumysyn baiaýlatatyn himiialyq zat. Bul zat adam aǵzasyna tússe júike júiesiniń, midyń jumysyna keri áser etedi.
