Germaniia ádilet ministri jeksenbi kúni sinagoga mańynda evrei stýdentine jasalǵan shabýyldy "baryp turǵan jeksuryn qylyq" dep atady. 4 qazanda eldiń soltústigindegi Gambýrg qalasynda 26 jastaǵy er adam sinagogaǵa kireiin dep turǵan jerde shabýylǵa ushyrap, basy jaraqattanǵan. Politsiia kúdikti retinde 29 jastaǵy Qazaqstanda týǵan etnikalyq nemisti ustaǵan.
"Evreilerge qastyq jasaý - elimizge basylǵan qara tańba. Biz evreilerge qarsy úgit-nasihat pen qastandyq-shabýyldardy toqtatýǵa kúsh salamyz" dedi ádilet ministri Kristine Lambreht.
Shabýyl kezinde basy jaraqattanǵan er adam aýrýhanaǵa túsken. "Nemis tolqynynyń" habarlaýynsha, ol birinshi soqqydan keiin jádel járdem kóligi kelgenge deiin shabýyldaýshydan jasyrynyp úlgergen.
Isti saiasi sipaty bar qylmysty zertteý jónindegi politsiia bólimi zerttep jatyr.
Bir jyl buryn qazan aiynda Germaniianyń Galle qalasynda da sinagogaǵa shabýyl jasalǵan. Evreiler merekesin toilaý kezinde qarýly er adam sinagogaǵa basyp kirýge tyrysqan. Ol áreketinen túk shyqpaǵan soń kóshede ketip bara jatqan er adamǵa oq atyp, ol adam sol jerde qaza tapqan.
Sinagoga ravvini Shlomo Bystritskii aqparat quraldaryna bergen suhbatynda Galle oqiǵasynan beri "nendei sabaq ala almadyq, másele sonda bolyp otyr" dep málimdegen. Bystritskii jeksenbi kúni sinagogaǵa kelýshilerdiń shabýyldan qatty shoshyǵanyn aityp ótken.
