Germaniiada qatań karantin talaptary 14 aqpanǵa deiin uzartyldy. Bul týraly federaldy úkimet pen federaldy jerlerdiń bilik ókilderi kelisti, dep habarlaidy Euronews.
Elde pandemiia bastalǵaly 2 millionnan astam adamnan koronavirýs anyqtalǵan. Nemis BAQ-tarynyń málimdeýinshe, Berlinde odan da qatań sharalar, sonyń ishinde qoǵamdyq kólik jumysyndaǵy shekteýler nemese qorǵanys deńgeii joǵary maskalardy mindetti túrde taǵý talaptaryn qoiý máselesi talqylanýda.
Ulybritaniiada bir táýlikte 1600-den astam adam qaitys bolyp, jańa antirekord ornady. Ótken aptada koroldikte jan basyna shaqqandaǵy ólim jaǵdaiynyń álemdegi eń joǵary deńgeii tirkeldi: ár on million adamǵa shaqqanda 165 ólim.
Eýropada ólim kórsetkishi boiynsha ekinshi orynda turǵan Italiiada seisenbi kúni 600-den astam adam kóz jumdy. El biligi «belsendi taralyp jatqan» koronavirýstyń jańa kezeńi týraly aitýda. Ótken aptada karantin sharalary men aimaqtar arasyndaǵy qozǵalysqa salynǵan tyiym kem degende 15 aqpanǵa deiin, al túngi komendanttyq saǵat 5 naýryzǵa deiin kúshinde bolatyny jariialandy.
Buǵan deiin Italiianyń Densaýlyq saqtaý ministri Roberto Sperantsa eldegi tótenshe jaǵdai rejimi 2021 jyldyń sáýir aiynyń sońyna deiin uzartylatynyn aitqan bolatyn.
Qytaida úlken karantindik ortalyq Hebei provintsiiasynyń astanasy Shitsziachjýannyń shetinde 1700 palatalyq keshen salynýda. Elde bir apta qatarynan kún saiyn júzden astam ólim tirkelgen. Bul – ótken jyldyń naýryz aiynan bergi eń joǵary kórsetkish.
Kaliforniia rastalǵan infektsiia juqtyrǵandar sany 3 millionnan asqan AQSh-tyń alǵashqy shtaty boldy. Jalpy, Qurama Shtattarynda 24 millionnan astam koronavirýsqa shaldyǵý jaǵdaiv anyqtaldy, 400 myńǵa jýyq azamat qaitys boldy. Virýs juqtyrý jáne ólim jaǵdaiy kórsetkishteri boiynsha AQSh álemde birinshi orynda.
