Jaqynda WBA Super, WBC men IBO boiynsha álem chempiony Gennadii Golovkin tórt belbeýin Elbasy Nursultan Nazarbaevqa syilady. Kúni keshe barlyq belbeýler QR Prezidenti murajaiyna tapsyrylǵan bolatyn, dep habarlaidy QazAqparat tilshisi.
Qazaqstannyń kásibi boks federatsiiasynyń vitse-prezidenti Viktor Demianenkonyń aitýynsha, sportshy óz belbeýlerin bireýge syilasa, boks uiymdary oǵan dýblikatty jasap bere alady. Sondyqtan aldaǵy jekpe-jekte Gennadii Golovkin jańadan jasalǵan belbeýlerin alyp shyǵady. «Negizi, ondaida boksshynyń komandasy halyqaralyq boks federatsiialaryn eskertip qoiady. Sonyń negizinde belbeýlerdiń kóshirmeleri jasalady. Óitkeni ár túrli jaǵdailar bolady ǵoi. Bireýge syilaidy, joǵaltady, ia bolmasa, urlatyp alady. Ondaida dýblikatty jasap beredi. Árine, belbeýdiń kóshirmesi tegin jasalmaidy. Oǵan aqsha tóleýge týra keledi», - dedi V.Demianenko QazAqparat tilshisine bergen suhbatynda.
Aita ketken jón, QR Prezident murajaiyna berilgen belbeýlerdiń ishinde IBF uiymynyń ataǵy da bar.
V.Demianenkonyń sózine qaraǵanda, atalǵan boks federatsiiasy óz belbeýin alyp qoisa da, Golovkin osy tujyrymnyń chempiony bolyp qala beredi. Sebebi eshkimnen jeńilgen joq. Belbeýdi de ózinde qaldyrýǵa quqyǵy bar.
«Gennadii IBF chempiony bolyp qala beredi. Mysaly, «2015-2018 jyldary bolǵan álem chempiony» dep jazady. Aldaǵy ýaqytta osy ataqty qaitaryp alsa, eki dúrkin chempion atanady», - dep atap kórsetti V.Demianenko.
Aita keteiik, 15 qyrkúiekte Gennadii Golovkin meksikalyq Saýl Alvarespen kezdesedi. Ýaqyt aiyrmashylyǵyna bailanysty Qazaqstanda atalǵan jekpe-jek 16 qyrkúiekte kórsetiledi. Sol kezde WBA Super, WBC men IBO belbeýleri sarapqa salynady. Al qazan aiynda Deniel Djeikobs pen Sergei Derevianchenko IBF titýly úshin talasady. Aldaǵy ýaqytta osy eki jekpe-jektiń jeńimpazdary judyryqtasýy ábden múmkin.
