General Beket Aimaǵambetov: Qyzmetkerlerdi yntalandyrýǵa basymdyq berilý tiis

 Qostanaida patrýldik politsiia jasaqtarynyń garnizondyq jiyny ótti. Qostanai oblysy politsiia bastyǵy, general Beket Aimaǵambetov jeke quram aldynda sóilegen sózinde ishki ister organdaryn reformalaý jáne «Halyq únine qulaq asatyn memleket» qaǵidatyn iske asyrý jónindegi mindetterdi atap ótti, dep habarlaidy QazAqparat tilshisi.

Tuńǵysh Prezident kúnin merekeleý qarsańynda ótken jiynda Beket Aimaǵambetov politsiianyń bir jyl boiy atqarǵan jumysyna toqtaldy. 

«Aldymen barlyq qyzmetkerlerdi kele jatqan merekemen quttyqtap, densaýlyq pen jumysta joǵary kórsetkishterge qol jetkizýdi tileimin. Patrýldik politsiia jumysynyń mańyzdy kórsetkishteriniń biri azamattarǵa kómek kórsetý jáne qylmystardy izin sýytpai ashý, sol úshin halyqtyń alǵysyna bólený. Búginde kóshelerde jáne qoǵamdyq oryndarda jaiaý patrýldeýge nazar aýdaryldy. Jasalǵan quqyq buzýshylyqtarǵa jedel den qoiýdyń arqasynda qylmystyń aitarlyqtai tómendegeni baiqalady. Osy jyldyń ózinde eki patrýldik politsiia batalony 500-den astam qylmysty ashyp, 100-den asam júrgizýshige kómek kórsetti», - dedi Beket Aimaǵambetov jeke quram aldynda sóilegen sózinde.

Búginde Qostanai oblysynyń patrýldik politsiiasy qajetti quralarmen jabdyqtalǵan. Atap aitqanda, ár ekipajda elektrondyq rýletkalar, pýlverizatorlar, planshetter bar. Sonymen qatar tártip saqshylary jol-kólik oqiǵasyn tirkeý ýaqytyna ózgeris ákeldi. Patrýldeýshi qyzmetker jol-kólik apaty ornyna kelgende aldymen oqiǵa jelisin syzady. Qujattar jergilikti politsiia qyzmetinde resimdeledi. Osylaisha, kólikter jolda turmaidy, al jol-kólik oqiǵalaryn tirkeý ýaqyty 30 minýtqa deiin qysqardy.
«Búgin sizder qiyn jaǵdaida jumys isteisizder jáne óz densaýlyqtaryńyzdy qorǵaý kerek. Barlyq qyzmetkerler qajetti qorǵanys quraldarymen qamtamasyz etilgen. Qazirdiń ózinde Qostanai oblysy PD emhanasy men gospitalin nyǵaitý boiynsha sharalar qabyldanýda. Jaqyn arada munda rentgen jáne ÝDZ apparaty paida bolady. Qajetti dári-dármekter satyp alyndy», - dep atap ótti Beket Aimaǵambetov.
Politsiia bastyǵy politsiia qyzmetkerlerin materialdyq yntalandyrý boiynsha qabyldanatyn sharalar týraly da aitty.

 «Biyl sógis almaǵan árbir qyzmetker koronavirýsqa qarsy kúreste qyzmet istegeni úshin syiaqy alatyn bolady. Bul óz qyzmettik mindetterin tiimdi oryndaýǵa yntalandyrady», - deidi politsiia generaly.
Máselen, patrýldik politsiia rotasynyń komandiri Marat Nurymbetovke osy jyly qylmysty «izin sýytpai» ashqany úshin syiaqy berildi. Ol óziniń seriktesimen birge birqatar avtokólik urlyqtaryn jasaǵan kúdiktini ustady.
Qazirgi ýaqytta oblysta politsiiaǵa 90-nan astam volonter uiymy kómek kórsetedi, olardyń quramynda 3 myńǵa jýyq adam bar.