Búginde elordany gazdandyrý jumysy qarqyndy júrip jatyr jáne astanalyqtardy kógildir otynmen qamtý jospar boiynsha birneshe kezeńnen turady, dep habarlaidy QazAqparat.
Taǵy bir jait mamandardyń málimdeýinshe, Nur-Sultan qalasyn gazǵa qosý, shahardan jyl saiyn shyǵatyn qaldyqtardyń kólemin 40 myń tonnaǵa deiin azaitýǵa múmkindik beredi eken. Bul týraly qalalyq Otyn-energetikalyq kesheni jáne kommýnaldyq sharýashylyq basqarmasynyń basshysy Tólegen Qulushev málim etti
«Elordaǵa gaz tartý jobasy úsh kezeńge bólingen. Gaz qurylysynyń alǵashqy kezeńi 2019 jyldyń kúzinde bastalyp, ol 9 iske qosý kesheninen turdy. Búginde ekinshi jáne úshinshi kezeń boiynsha jobalaý jumystary júrip jatyr. Onyń oryndalý merzimi biyl bastalyp, 2023 jylǵa deiin sozylady. Sol siiaqty ol respýblikalyq jáne jergilikti biýdjet esebinen qarjylandyrylady. Odan bólek, gaz tartý jumysyna jeke investorlardy da tartý qaralyp jatyr. Qazirgi ýaqytta 1-shi, 2-shi, 3-shi, 4-shi jáne 7-shi gaz keshenderin iske qosý jumystary aiaqtaldy», - dedi Tólegen Qulushev elorda máslihatynyń turaqty komissiia otyrysynda jasaǵan baiandamasynda.
Onyń aitýynsha, búginde elorda irgesindegi «Jeleznodorojnyi», «Kóktal-1», «Kóktal-2» turǵyn úi alaptary men Agroqalashyq shaǵyn aýdanynyń bir bóligi kógildir otynǵa qosylǵan.
«Halyqty gazben qamtý jumysy kezeń-kezeń boiynsha júrip jatyr. Sondai-aq, ótken jyly qaladaǵy JEO-1 jáne JEO-2-da gaz berildi. Biyl qarashaǵa deiin 5-shi,8-shi jáne 9-shy gaz keshenderi iske qosylady. Sol siiaqty 2020 jyldan bastap JEO-2-de bir qazandyq, JEO-1-de úsh qazandyq gazben qamtamasyz etilse, biyl JEO-2-de bes qazandyq, JEO-1-de tórt qazandyq gazǵa kóshiriledi. Odan bólek, qala boiynsha 19 áleýmettik nysandy gazǵa kóshirý jumysy júrgizilýde. Elorda men onyń irgesindegi turǵyn úi alaptaryn gazdandyrý qaladan shyǵatyn qaldyqtardyń kólemin 40 myń tonnaǵa deiin azaitýǵa múmkindik beredi. Sonymen qatar búginde jurttyń kópshiligi gaz ballondaryn paidalanyp otyr, osy oraida tabiǵi gaz oryn alýy múmkin tótenshe jaǵdailardyń týyndaý táýekelin barynsha azaitady», - deidi ol.
