Foto: Hatem Moussa / AP
Izrail Syrtqy ister ministrligi Eýraziia jáne Balqan máseleleri jónindegi bas direktorynyń orynbasary Simona Galperin Gazada qalǵan 76 qazaqstandyqtyń aman-esen oralýy Mysyr biligi men HAMAS-tyń áreketine bailanysty ekenin aitty, dep habarlaidy Kazinform agenttigi.
«Gazada qalǵan qazaqstandyqtar da sondaǵy birneshe myń sheteldik siiaqty jaǵdaida. Biz Qazaqstan tarapynan ózge túrli elder siiaqty sondaǵy azamattarynyń tizimin aldyq. Izrail tarapy olardyń Gazadan shyǵýyna eshqandai qarsylyǵymyz joq. Kerisinshe qoldaimyz, múmkin bolǵansha Gazadan shyǵýyna kúsh salamyz. Problema qaida? Birinshiden, Mysyr arqyly shyǵý kerek edi. Mysyrlyqtar sheteldikterdiń Gazadan óz shekarasy arqyly shyǵýyna ótken aptada ǵana ruqsat bere bastady. Úsh apta boiy ondaiǵa ruqsat bergen joq. Qazir ruqsat bergenimen, kún saiyn shyǵatyn adam sanyn shektep otyr. Ár kún saiyn 500-600 adamnan aspai tur. Gazada shamamen 7 myń sheteldik bolsa, kún saiyn 500 adam degende, báriniń shyǵýy úshin 2 aptadai ýaqyt keteýi múmkin. Ol jaqta kezek qalai qurylyp, qalai shyǵarylyp jatqanyn bilmeimin. Biraq biz búkil tizimdi berdik», - dedi Izrail SIM ókili Taiaý Shyǵystaǵy aýhal týraly brifingide.
Sondai-aq ol HAMAS-tyń sheteldikterdi de tiri qalqan retinde ustap otyrǵanyn aitty.
«Aldyńǵy kúni jáne keshe ne boldy? Bul kúnderi HAMAS tutqyndaǵylardyń shyǵýyna ruqsat bermedi. Ózderińiz bilesizder, ol jerde izraildikter ǵana emes, palestindikter de kepildikte otyr. Endi sondaǵy sheteldikterdi jibergisi kelmei otyr. Sondyqtan Izrail tarapynan shekteý nemese problema joq. Bizge áskeri operatsiia júrip jatqan Gazadan beibit azamattar neǵurlym kóbirek shyǵyp, HAMAS qana qalǵany kerek», - dedi Simona Galperin.
Syrtqy ister ministrliginiń málimeti boiynsha, Gaza sektorynda qazir Qazaqstannyń 76 azamaty bar.
«Bizdiń derekterimiz boiynsha Gaza sektorynda Qazaqstan Respýblikasynyń 76 azamaty bar. Otbasy múshelerimen qosa eseptegende olardyń sany – 161. Sonymen qatar sheteldik azamattardyń shyǵýyna bailanysty Mysyr jáne Izrail tarapynan belgili talaptar bar. Olardyń úshten biri evakýatsiialaýǵa kelmeidi. Olar - kámeletke tolǵandar, erli-zaiyptylar», - dedi ministrliktiń resmi ókili Aibek Smadiiarov ministrlikte ótken baspasóz máslihatynda.
Eske salsaq, Gaza sektoryndaǵy palestinalyq radikaldar Izrail aýmaǵyna zymyran atqylap, Izraildiń ortalyǵy men ońtústiginde erekshe jaǵdai engizilgen edi.
Sońǵy málimetter boiynsha, Izrail áskeri Gazany tolyǵymen qorshap, ekige bólip tastaǵan.
