Sýret: Sputnik / Tabyldy Kadyrbekov
Energetika ministri Bolat Aqsholaqov ballonmen satylatyn gazdyń baǵasy tómendeitinin málimdedi, dep habarlaidy Sputnik Qazaqstan.
Májilistegi úkimet saǵatynda depýtattar ballonmen satylatyn gaz máselesine toqtaldy. Búginde ondai gazdyń baǵasy litrine 116 teńgeden bastalady. Al janar-jaǵarmai quiý stantsiialarynda dál sondai gaz eki ese arzan turady. Ministr Aqsholaqov ol máseleni biletinin jáne kópten beri talqylap jatqanyn jetkizdi.
"Shynymen de, ol eki gazdyń eshbir aiyrmashylyǵy joq. Janar-jaǵarmai stantsiiasy bolsyn, gaz ballonyn toltyratyn oryndar bolsyn, bárinde suiyltylǵan gaz satylady. Biz osy másele boiynsha jumys istep jatyrmyz. Baǵa rettelse, birdei bolady. Turmystyq maqsatta qoldanylatyn gazdyń baǵasy janar-jaǵarmai stantsiialarymen birdei, 50-70 teńgeniń mańaiynda bolady", - dedi Aqsholaqov.
Ministr gaz ballondardyń qaýipsizdik máselesine de toqtaldy. Sebebi "bala kezinde kórgen ballondar áli kúnge deiin ainalymda júrgenin" atap ótti. Aldaǵy ýaqytta gaz ballondardy tekserý talaby engiziledi. Árbir ballon tirkeýge alynady jáne tehnikalyq tólqujat beriledi.
