Qazaq ulttyq qyzdar pedagogikalyq ýniversitetiniń rektory, professor Gaýhar Aldambergenova «Pedagog mártebesi týraly» Zańǵa qatysty pikir bildirdi, dep habarlaidy "Ult aqparat".
«Memleket basshysy Qasym-Jomart Toqaev «Pedagog mártebesi týraly» Zańǵa qol qoidy. Bul – qazaqstandyq ustazdar qaýymynyń qoǵamdaǵy bedelin arttyryp, ornyn aishyqtaýǵa baǵyttalǵan zor qadam boldy. 21 baptan turatyn jańa Zań jarty millionnan astam ustazdyń jumysyna qatysty. Onda tórt baǵyt qamtylǵan. Birinshiden, pedagogterdiń quqyqtaryn keńeitý jáne ózine tán emes jumystardan bosatý, olardyń júktemesin azaitý. Ekinshiden, muǵalimniń qyzmetine qoiylatyn talaptardy kúsheitý. Úshinshiden, materialdyq emes yntylandyrý tetikteri jáne tórtinshiden, materialdy yntalandyrý qadamdary», - dep atap ótti Qyzdar ýniversitetiniń rektory.
Oqý ornynyń basshysynyń paiymdaýynsha, jańa zań kóptegen múmkindikterge jol ashyp, tyń serpin beredi.
«Qazaqstan Respýblikasynyń Tuńǵysh Prezidenti – Elbasy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda áleýmettiń áleýetin arttyrý maqsatyndaǵy naqty iske asýy tiis mindetterdi belgilep bergen bolatyn. Elbasy jariialaǵan mańyzdy qujatta «Pedagog mártebesi týraly» Zań qabyldaý qajettigi de aityldy. Osy oraida Bilim jáne ǵylym ministrligi aýqymdy jumystar júrgizip, naqty ister atqardy», - deidi Gaýhar Aldambergenova.
Elimizdegi ustazdar daiarlaityn irgeli bilim ordasynyń rektory jańa zańda qarastyrylǵan basymdyqtar men tetikter tóńireginde de atap ótti.
«Parlament Senatynyń jalpy otyrysynda zań jobasyn tanystyrǵan elimizdiń bas pedagogi Ashat Aimaǵambetov muǵalim mártebesin arttyrý onyń qyzmetine qoiylatyn talaptardy kúsheitýdi qajet etetindigin erekshe atap ótken bolatyn. Bul oraida jańa Zań ustazdardyń etika máselelerine de jete kóńil bóledi. Oǵan sáikes ár bilim mekemesinde ádep boiynsha keńester institýty engizilmek. Meniń oiymsha, bul bastama óz kezeginde bilikti de bilimdi, «ustaz» degen atqa laiyqty naǵyz mamandar mektebiniń qalyptasýyna negiz bolady. Sonymen qatar Prezident Qasym-Jomart Toqaevtyń byltyrǵy Tamyz konferentsiiasynda bergen tapsyrmasynyń aiasynda aldaǵy tórt jyl ishinde muǵalimderdiń eńbekaqysy eki esege artady jáne biyldan bastap pedagogterdiń jalaqysy 25 paiyzǵa ósedi dep kútilýde», - dedi G.Aldambergenova.
Onyń pikirinshe, jańa Zań muǵalim bedelin arttyrýmen qatar, pedagog kadrlaryn daiarlaityn oqý oryndarynyń da mańyzyn aiqyndaidy.
«Elimizdegi eń irgeli joǵary oqý orny Qazaq ulttyq qyzdar pedagogikalyq ýniversiteti negizinen aýyldyq eldimekenderdegi bilim oshaqtary úshin maman daiarlaidy. Óziniń 75 jyldyq tól tarihynda oqý orny 60 myńnan astam pedagog daiyndady. Osy oraida atap ótken jón, halyqtyń ómir súrý deńgeii men sapasyn aitarlyqtai arttyrý jáne joǵary kásibi kadrlardy tiimdi molaitýǵa baǵyttalǵan elimizde júrgizilip jatqan saiasat pedagog kadrlardy qalyptastyrý máselelerin týyndatýda. Bul másele qai kezeńde de óte ózekti bolǵan. Máselen, búginde halyqtyń demografiialyq ósý jaǵdaiyna bailanysty mektepke deiingi jáne jalpy orta bilim mekemeleriniń turaqty ósýi baiqalyp otyr», – dedi óz sózinde ýniversitet rektory.
Onyń aitýynsha, bilim berýdi, ǵylym men mádenietti qalyptastyrýǵa yqpal etetin muǵalimniń kásipqoilyǵy men biliktiligine qoiylatyn talaptar kúsheiýde.
«Kadrlardy qalyptastyrýdyń taǵy bir máselesi – eńbekaqynyń tómendigi, pedagog kadrlardyń zeinetke deiingi jasy jáne beiindi biliminiń bolmaýy. Úshinshi másele, bilim berýdiń barlyq deńgeilerindegi oqytý baǵdarlamalarynyń bir-birinen alshaqtyǵy. Máselen, jalpy orta bilim berý mekemeleri jańartylǵan mazmun boiynsha bilim berýge kóshkende, mektepke deiingi bilim berý baǵdarlamasy aitarlyqtai ózgeristerge ushyraǵan joq. Qazaq ulttyq qyzdar pedagogikalyq ýniversitetiniń basty qyzmetiniń biri – joǵaryda atalǵan máselelerdi ońtaily sheshý. Búginde oqý ornynda osy tarapta birqatar naqty ister júzege asyrylýda. Ujymnyń professor-oqytýshylary óz qyzmetinde bolashaq pedagogterdiń kásibi beiimdelýi úshin pedagogikalyq kadrlardy daiarlaýdyń bilim berý baǵdarlamalaryn tájiribege baǵyttaý negizinde júrgizedi», – dedi ýniversitet rektory.
Gaýhar Aldambergenova qoǵamnyń talqylaýynan ótip, pedagog qaýymynyń usynystary negizinde muqiiat daiarlanǵan jańa zań muǵalim mártebesiniń qoǵamdaǵy bedelin shynaiy kóteredi degen senimde. Onyń pikirinshe, ustazdyń bedeldi – qoǵamnyń bedeli, memleket bolashaǵynyń naqty kepili.
.jpeg)