Alaiaqtyq jasady dep aiyptalyp, 6 jylǵa bas bostandyǵynan aiyrylǵan Gaýhar Álimbekovanyń advokaty Jumaǵali Zinelov istiń mán-jaiyn aitty, - dep habarlaidy Tengrinews.kz.
Advokat sot úkimimen kelispeitinin jáne apelliatsiialyq sotqa aryz túsiretinin málimdedi.
Onyń málimetinshe, is 2013 jyly bolǵan. Ferýza Ordabaeva Almatydaǵy "Aqkent" turǵyn úi kesheninen páter alyp beremen dep 35 adamdy aldap soqqan. "Ákimdiktenmin" degen áielge aldanǵandar ishinde Álimbekova da bar.
Ordabaeva ánshiniń kontsertterine baryp, jaqyn tanysqan. Gaýhar Álimbekova alaiaqtyń sózine senip, úsh týysyna 40 myń dollarlyq úsh páter alyp beripti.
Bir jyl ótken soń ánshiniń úiine kelgen qurbysy páterge qyzyǵyp, Ordabaevamen tanysady. Ol da alaiaqtyń qolyna 40 myń dollar ustatyp, baspanaly bolǵan.
Tipti ánshi men aryzdanýshy Nazarova (qurbysy -red) bir podezde turǵan. Al keiinnen bul úi kelisimshartpen bólip tóleýge satylatyn 37 mln teńgeniń úii bolyp shyqqan.
Advokattyń aitýynsha, 40 myń dollardy alǵan alaiaq tek páterdiń bastapqy jarnasyn tólegen. Arada eki jyl ótkende úidi salǵan kompaniia bulardy qýyp shyǵady. Páter alýshylar ai saiyn 250 myń teńge tóleý kerektigin kelisimsharttan oqymaǵan. Osylaisha Gaýhar men qurbysy Nazarova jáne 35 adam dalada qalypty.
Artynsha zardap shekkender áieldi izdep, sotqa aryzdanǵan. Al Álimbekovanyń qoly bosamai, aryz jazbapty.
"Bul iste ánshiniń ózi zardap shekti. Ol úsh birdei úidiń aqshasynan aiyrylyp otyr. 2016 jyly istiń basty figýranty Ferýza Ordabaeva 7 jylǵa sottalǵan", - deidi advokat.
2017 jyldyń sońyna deiin aqshasyn kútken B.Nazarova shydamy taýsylyp, Gaýhardyń ústinen aryz túsiripti.
Advokattyń oiynsha, aiyptaý aktisi qate shyǵarylǵan. Ánshiniń kinási men paida kórgenin dáleldeitin birde-bir qujat bolmaǵan.
"Ol aldaǵysy kelgen adamǵa ózimen kórshi úidi alyp bere me? Bul logikaǵa jatpaidy", - dedi advokat.
Esterińizge sala keteiik, 30 qańtar kúni Gaýhar Álimbekovanyń "alaiaqtyq" úshin 6 jylǵa sottalǵany belgili boldy.
Otandyq ánshiler de jýrnalistiń sózine qoldaý bildirip, Gaýhar Álimbekovaǵa kómek kórsetýge daiyn ekenin jetkizdi.
