Juma kúni tańerteń Soltústik Koreianyń (KHDR) basshysy Kim Chen Yn Ońtústik Koreia prezidenti Mýn Chje Inmen kezdesý úshin Phanmýndjomda shekarasyn kesip ótti. Dál osy jerde 1953 jyly 27 shildede Ońtústik jáne Soltústik Koreia arasyndaǵy bitimgershilik týraly kelisimge qol qoiyldy. Osylaisha ol 1950-1953 jyldary bolǵan Koreia soǵysynan keiin Ońtústik Koreianyń shekarasyna aiaǵyn attap basqan KHDR-dyń alǵashqy kóshbasshysy boldy, dep habarlaidy Rionhap agenttigi.
KHDR men Ońtústik Koreia liderleri Kim Chen Yn men Mýn Chje In eki el arasyndaǵy demarkatsiialyq syzyqta ornalasqan Phanmýndjom pýnktinde kezdesip, qol alysty. Keiin qos el basshylary sýretke túsip, koreiaralyq sammit bastalǵan ǵimaratqa kirdi, dep jazady RIA Novosti. Bul týraly sputniknews.kz jazdy.
Kim Chen Yn Soltústik Koreia delegatsiiasy kelissózderge beibitshilik pen gúldený jolyndaǵy jańa tarihty bastaý úshin kelgenin aitty. Osy oraida Mýn Chje In áriptesin ýaǵdalastyqtarǵa qol jetkizýge shaqyrdy.
"Eger biz shynaiy dialog júrgizsek, beibitshilikke umtylǵan ultymyz ben barsha adamzatqa úlken syi jasaimyz", — dedi ol.
"Bizdiń tóraǵamyz Kim tarihta alǵash ret áskeri-demarkatsiialyq syzyqty kesip ótti. Dál osy sátte Phanmýndjom bóliný simvoly emes, beibitshilik simvolyna ainaldy", — dep qosty Ońtústik Koreia lideri.
Kelissózderdiń birinshi kezeńinen keiin Ońtústik Koreia prezidenti ákimshiliginiń ókili málimdegendei, Kim Chen Yn ońtústikkoreialyq áriptesine jii kezdesip turýdy usynǵan.
Búgin qos memleket basshylary Soltústik pen Ońtústiktiń qarym-qatynasyn jaqsartý jáne qaita birigý perspektivalaryn talqylaidy.
Aita ketsek, Kim Chen Yn sońǵy 65 jylda Ońtústik Koreia jerine aiaq basqan KHDR-dyń alǵashqy basshysy bolyp otyr.
