Ánshi Ǵalymjan Moldanazar “Dopesoz” podkastynda qonaq bolyp, halyqtyń jai-kúii men eldegi bolyp jatqan oqiǵalar týraly oi órbitti.
Ánshiniń aitýynsha, bolashaqqa senim azaiyp, adamdardyń oilaý qabileti, sana-sezimi ózgeriske ushyraǵan.
“Eldegi bolyp jatqan oqiǵalar adamdy oilandyrmai qoimaidy. Sol úshin ózimdi kóp dúnieden shekteimin. Kórip, estip, oqyp otyryp ashýlanasyń. Jek kórip ketesiń. Biz – kórgensiz halyqpyz. Dym kórgenimiz joq. Halyqqa ý berip, sý deseń, ishe beredi. Bir-birin syilaý, ádep degen dúnielerden ajyrap qaldyq. Ádepti bolaiyq, patriotizmdi nasihattaiyq dep jurtqa aitsań, kúlkige qalasyń. Ádepsiz bilimdi adam bomba jasaýy múmkin. Ádepsiz bilimdi adam, bilimsiz adamdy qoldanady. Onyń ar-uiaty mazalamaidy. Eshkimge jany ashymaidy. Ol úshin ulttyq ideologiiany qolǵa alý kerek”, – dep jan syryn aqtardy ánshi.
Sondai-aq óner iesi qazaq tiliniń bolashaǵy týraly da syr shertti. Tipti, orystildi dostary qazaqsha úirenip alǵan kórinedi.
“Men úshin, til – qatynas quraly. Shynymdai aitsam, orys tilinde qate sóilesem, uialmaimyn. Ol – shetel tili. Men aýyldyń balasy bolǵandyqtan, qate jiberýim keshirimdi dep oilaimyn. Ońtústik jaqta orystardyń ózi taza orys tilin bilmeidi. Adam synamas buryn, ózine qaraýy kerek. Biz qate sóilesek, jurt kúledi dep odan saiyn keiin sheginemiz. Meniń orystildi dostarym maǵan erip, qazaqsha sóilep júr. Keide bas qosyp, oiyn oinaimyz. Sol kezde “Durys aittym ba, myna sóz qazaqsha qalai aitylady?” dep suraidy. Qatty qýanyp qalamyn”, – dedi.
